“Beldur barik adieraz zaitez” lelopean, berriro ere Berdinsarea emakume eta gizonen berdintasunaren aldeko eta emakumeenganako indarkeriaren aurkako Araba, Bizkaia eta Gipuzkoako udalen sareak martxan jarritako kanpainarekin bat egin du Getxoko Udalak. Herritarren artean puntu lila daramaten hainbat artikulu banatzeaz gain, 3.200 kartel, 3.000 txartel eta zorro eta 1.000 binilo dendetarako eta ostalaritza establezimenduetarako izango dira.
Baina, bestelako ekitaldirik ez da faltako. Bihar, asteazkena, ipuin kontalarien saioa izango da Algortako Villamonte kaleko kultur etxean. “Habra un dia en que todas..." izenburuko emanaldia eskainiko du, 19:00etatik aurrera, A la Luz de las Velas kolektiboak. Hilaren 25ean, osteguna, Gizatiar elkarteak deitutako elkarretaratzea izango da Areetako Bizkaia Zubiko plazan, 19:30ean.
Emakumeenganako Indarkeriaren aurkako Nazioarteko Egunaren harira, hainbat ekintza aurrera eramango ditu Getxoko Udalak. Bihar zein etzi karpa bana jarriko dute Areetako Xake eta Algortako Bidezabal geltoki ondoko plazetan, puntu lilak (indarkeriaren kontrako sinboloa), garraio tiketetarako zorroak, indarkeria kasuetarako telefono erabilgarriak dituzten txartelak eta "Beldur Barik" lelopeko gazteentzako informazio gidak banatzeko. Ordutegia 11:30etik 13:30era eta 17:00etatik 20:00etara izango da. Azaroaren 25ean bertan, puntu lila daramaten pankartak jarriko dituzte musika eskolan, Santa Klara jauregian, udaletxean eta San Nikolaseko liburutegian. Gainera, urtero bezala, udal batzarrera eramango dute adierazpen instituzionala. Ostiralean izango da osoko bilkura. Guzti horren bitartez, emakumeek jasaten duten indarkeria sinbolikoa ere nabarmendu nahi dute aurten. Udal iturriek adierazi dutenez, "ia ikusezina den bortxaketa sinboliko horrek (mehatxua, laidoa, iraina, gutxiespena, arbuio afektiboa...), emakumezkoen identitatea deuseztatzeaz gain, indarkeria fisikoa ahalbidetzen du". Argazkian, aurten ere elkarretaratzea egingo dute, hilaren 25ean, Areetako Bizkaiko Zubiko plazan / Urtzi Altube - Ilanda.eu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun