Azaroaren 25erako deialdiak Uribe Kostan eta Erandion
• Leioan, arratsaldeko 18:30ean, Bulebarrean elkarretaratzea egingo dute mugimendu feministak zein Udalak.
• Berangon, iluntzeko 18:45ean, ekitaldi instituzionala egingo dute, Berangoeta kultur etxean, adierazpen instituzionala irakurriz. Anabel Landa alkateak eta Ane Miren Ayo tokiko Berdintasun arduradunak parte hartuko dute horretan. Ondoren, musika emanaldia eskainiko du Impromptu taldeak. Bestalde, genero indarkeriaren kontrako hainbat kartel erakutsiko dituzte kultur etxean. Erakunde publiko zein pribatuei eskatutako lanekin osatu dute mostra.
• Sopelan, arratsaldeko 7etan, Itzartu emakumeen elkarteak ekitaldia egingo du Udaletxeko plazan, Sopelako Udalaren laguntzaz. Besteak beste, emakumeenganako indarkeriaren aurkako adierazpena irakurri eta mahai-ingurua egingo dute bertan.
• Iluntzeko 7etan, Urdulizen, bi atalez osatutako ekitaldia egingo du, Inola emakumeen elkarteak. Batetik, emakumeenganako indarkeriaren aurkako adierazpen instituzionala irakurriko dute; eta bestetik, "La riqueza de las mujeres" izeneko ipuin kontalaria izango dute nagusiek. Ekimena tokiko kultur etxean egingo dute. Inola emakumeen elkarteak jakinarazi duenez, "Udalaren laguntasuna eta presentzia eskatu dugu, baita alderdi guztiena, udal elkarteena eta bestelako taldeena ere".
• Arratsaldeko 7etan, kontzentrazioa egingo dute Erandioko Altzaga auzoan, metro geltoki ondoan, Erandioko Emakume Gazteen Asanbladak deituta.
• Ordu erdi beranduago, iluntzeko 7:30ean, elkarretaratzea egingo du Itzubaltzetako Kolas plazan Itzubaltzetako Emakumeak kolektiboak.
• Ordu berean, arratsaldeko 7:30ean, Gizatiar elkarteak deitutako elkarretaratzea izango da Bizkaia Zubiko plazan, Areetan.
• Azkenik, iluntzeko 20:00etan Emakumeenganako indarkeriaren kontrako eskualde mailako mobilizazioa egingo dute Algortan, Telletxen, Bilgune Feministak deituta.
Emakumeenganako indarkeria errefusatzeko zortzi ekimen izango dira bihar eskualdean
2010ko aza. 24a, 22:44
Bihar, azaroak 25, Emakumeenganako Indarkeriaren Aurkako Nazioarteko Eguna izanik, zortzi ekimen anitz eta askotarikoak izango dira Uribe Kostan eta Erandion. Emakumeen elkarteek, mugimendu feministak eta udalek UKBERRI.NETi jakinarazi diotenez, arratsaldeko 18:30etik iluntzeko 20:00ak arte, zortzi ekitaldi eta mobilizazio izango dira Leioan, Berangon, Sopelan, Urdulizen, Erandion, Areetan, Itzubaltzeta / Romon eta Algortan. Guztietan emakumeek bere osotasun fisiko eta psikikoa segurtatuta izateko eskubidea aldarrikatuko bada ere, talde feministek pauso bat harago joatea eskatuko dute. Izan ere, Bilgune Feministak "emakumeon kontrako erasoen ofentsibara" pasatu nahi du, "autodefentsa feminista bultzatuz eta emakumeen arteko elkartasuna indartuz". Feministen aburuz, "kalea gurea da, emakumeoi gertatzen zaiguna publikoki salatuz eta eguneroko indarkeri egoerei aurre egin nahi diegu ozen. Instituzioak erantzuleak dira eta prebentzioaren beharra nabarmendu nahi dugu, asko dago hausnartzeko oraindik". Argazkian, pasa den uztailean Itzubaltzeta / Romon egindako mobilizazioa.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun