Erakusketak ez dira faltako aurtengo Getxoko Komiki eta Manga Azokan. Bederatzigarren ekitaldian, zenbait egileren lanen inguruko mostrak egingo dituzte. Horrela, aurten, Javier de Isusi, Ken Niimura eta Angel Unzuetaren erakusketa monografikoak egongo dira. Halaber, Azokan Injuve Espainiako Gazteriaren Intitutuaren ilustrazio lehiaketan garaile atera diren lanak ere ikusteko aukera izango dute komiki-zaleek. Horrekin batera, Euskadiko Ilustratzaile Profesionalen Elkarteak (EIPE) eginiko "El Balanzin" aldizkariaren nondik norakoak ezagutzeko tartea ere egongo da. Gainera, udal erakustaretoetan eta Getxoko zenbait tabernatan komiki erakusketak jarriko dituzte. Horietan EIPEren zenbait kideen lanak egongo dira ikusgai, "El Jueves" aldizkariaren 25 azal onenenekin batera.
Bestalde, argitaletxeen eta egileen nobedadeak aurkeztuko dituzte azokan. Egunero hitzaldi eta mahai-inguruak izango dira ekitaldi aretoan, baita proiekzioak ere, zikloetan bilduta: multimediako lanak, izan animazioak, film laburrak, dokumentalak edo animeak, hurrenez hurren. Mangari dagokionez, jarduera ugari egingo dituzte hilaren 28an, igandean, horri eskainitako egunean.
Bihartik aurrera komiki eta manga zaleak bilduko dira Areetan
2010ko aza. 25a, 10:58
Azaroaren 26tik 28era Getxoko bederatzigarren Komiki eta Manga Azoka izango da. Hiru egunetan zehar biñetaren munduko topagune bilakatuko da Areetako Xake plaza. Bertan, erosteko aukeraz gain, hainbat ekitaldi egongo dira. Batetik, 80 salmenta postu baino gehiago jarriko dituzte, non komiki-dendak, liburu-denda espezializatuak, aldizkariak, fanzineak, argitaletxeak eta "bederatzigarren arteari" loturiko hainbat sektore izango diren. Bestalde, ohi denez, ospe handiko egileak helduko dira Areetara. Horiek guztiak hitzaldietan eta aurkezpenetan arituko dira, hain arrakastatsuak diren sinatze-txandekin batera. Horrela, zaleek autorerik gustukoenak zuzen-zuzenean ezagutzeko aukera izango dute. Aurten Gilbert Shelton, Frederik Peeters eta Stuart Immonen egongo dira, besteak beste. Halaber, aipatzekoa da Antonio Altarriba eta Paco Roca artisten parte-hartzea. Lehenengoari Espainiako Komiki Saria eman berri diote, Kim ilustratzailearekin eginiko "El arte de kolar" lanarengatik. Bigarrenak iaz jaso zuen Espainiako Komiki Saria eta bere azken lana ekarriko du gurera: "El invierno del dibujante", hain zuzen ere. Horiekin batera, Ken Niimura, Angel Unzueta eta "El Jueves" aldizkariaren egileetako batzuk ere egongo dira Xake plazan. Izan ere, azken aldizkari horri omenaldia egingo diote azokan, bere jarduera dela eta. Radio Euskadiren "Pompas de papel" irratsaioari ere egingo diote gorazarre. Argazkian, Komiki Azokara hurbildutako hiru lagun, artxiboko irudian / © Getxoko Udala. Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun