Alde batetik, Getxoko Udalak 45.000 euro gastatuko ditu leku publikoetan jarriko den 4.780 metro luzeko argi-harian eta beste 94 mikrobonbilladun apaingarrietan. Eduardo Coste, Santa Ana plaza, Bizkaia Zubiko plaza, Areetako Etorbidea, Ganeta plaza, Artatza biribilgunea, Asuako errepidea, Arriluze, Zugatzarte, Basagoiti, Amezti, San Nikolas plaza, Euskalerria kalea, Manuel Gainza parkea, Bidezabal, Ormaza biribilgunea, Oiarretxe, Maidagan, Malakate, Andra Mari kiroldegia, Aingeruaren Etorbidea, Villaondoeta eta Salsidu kaleetako hainbat lekutan jarriko dira apaingarriak. Bestetik, tokiko erakundeak bere gain hartuko du udalerriko merkataritza-guneetako argiztapenaren kostu osoa ere: 55.000 euro, alegia. "Bezeroentzat ingurua erakargarriagoa egiteko, eta udalerriko merkatariek eta ostalariek euren jarduera gehitzeko helburuarekin", aipatu dutenez.
Ordutegia
Gabonetako argiztapena piztuta egongo da 18:00etatik 22:30ak arte, igandetik ostegunera, eta 18:00etatik gauerdira arte, ostiral eta larunbat gauetan eta jaiegunetako bezpera egunetan, 2011ko urtarrilaren 6ra arte.
Getxoko Udalak 100.000 euro gastatuko ditu udalerriko Gabonetako argiztapenean. Tokiko erakundeak bere gain hartuko ditu horrek eratorritako gastu guztiak, "bizi dugun krisialdian, bertoko merkataritza sektorearen alde egingo duen beste ekimen batean", Imanol Landa alkateak adierazi duenez. 2010ko Gabonetan merkataritza eta ostalaritza laguntzeko udal getxoztarrak aurrera eramango dituen ekimenen artean kokatu dute erabakia agintari getxoztarrek; merkataritza eta ostalaritza sustatzeko "Getxo Shop & Fun" izeneko kanpainaren barruan, alegia. Abenduaren 3an, 18:30ean, Areetako Andres Larrazabal eta Paulino Mendibil kaleen elkargunean, argiak pizteko ekitaldi ofiziala izango da. Landak egingo du, Getxo Enpresa eta Merkataritza (GEEM) elkarteko presidente Maite Ibarbengoechearekin eta Arenas eta Romo futbol taldeetako presidenteekin batera. Azken horiei oinarrizko futbolaren alde egindako lana eskertu nahi diete. Erromoko Kantariak talde koralak alaituko du ekitaldia. Argazkian, behargin bat Gabonetako argi-apainketak jartzen Algortako Telletxe kalean, artxiboko irudian.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun