Jose Vicente Ojinaga Alternatibako zinegotziak ere elkartasun osoa adierazi zien Iontxu Etxegarairen senide eta lagunei. Gabi Basañezen aldeko moziora bueltatuz, ondoren eztabaidatuko ziren beste bi proposamen izan zituen aipagai Leire Pinedo EAko zinegotziak, ezbaian zegoena "giza eskubideak" zirela adierazteko. Askapeneko kidearen aldeko mozioa babestu ez zuten arren, 12 urtetik hona AEBetan bost kubatar preso dituztela salatzeko zein Mendebaldeko Saharan gertatutakoa gaitzesteko eskaerei baietza emateko dudarik ez zuen izan EAJk eta PSE-EEk. Bitartean, Berta Rodriguez PPko ordezkariak "injerentziatzat" jo zuen Sopelako Udalbatzak AEB bezalako atzerriko herrialde baten prozesu judizialari buruzko iritzia ematea. Sahararren aldeko mozioari, ordea, baiezkoa eman zion.
Sopelako Udalbatzak atzo onartutako mozioa:
Duela aste batzuk, Gabi Basañez eta Askapeneko beste kide batzuk atxilotu eta espetxeratu zituzten. Gabik Sopelarekin lotura handia du eta bere lana guztiok ezaguna da.
Bestalde, Euskal Herrian bakea eta benetako demokrazia lortzeko urrats garrantzitsuak ematen ari dira. Beraz, distentsiorako eta ezberdinen artean zubiak eraikitzeko unea da.
Hau dela eta, gure auzokideon atxiloketak eta une honetan gertatzen ari diren jazarpen judizialak, polizialak eta bestelakoak behin betiko desagertu behar direlakoan gaude. Guztion konpromisoak beharrezkoak dira. Guztion ekarpen eraikitzaileak ezinbestekoak dira. Herritarron borondate askea dema politikoak bideratzeko epaile bakarra izan behar du.
Aro berria zabaltzen ari da gure herrian eta Gabirekin eta beste askorekin gertatu dena ez da etorkizun pozgarri horrekin bateragarria.
Hau guztia dela eta, Sopelako Udal Bilkurak ebazpen hauek hartzen ditu:
1.- Gabi Basañezen eta bere kideen lan publikoa, zilegia eta demokratikoa ez daiteke delitutzat har, beraz hauen askatasuna eskatzen dugu.
2.- Udal Bilkura honek gure herriaren etorkizun askea, demokratiko eta baketsuarekin bat egiten du. Hori gauzatze aldera Gobernuei, alderdi politikoei, erakunde armatuei eta gainontzeko eragile guztiei, indarkeria eta inposizio mota guztiak desagerarazteko erabakiak har ditzaten eskaera egiten die. Herriaren hitza, benetako askatasuna eta proiektu guztien aukera berdintasuna ezinbesteko osagarriak dira etorkizun berri horren orubea eraikitzeko.
3.- Udal Bilkura honek, Gabiren askatasuna eskatzeko eta errepresioa etetearen beharra eskatzeko azaroaren 28an burutuko den manifestazioarekin bat egiten du eta Sopelako herritarrei parte hartzeko gonbidapena luzatzen die.
4.- Erabaki hauek Gabiren familiari helarazteaz gain, Espainiako eta Frantziako barne Ministerioari eta Gobernu Lehendakaritzei helaraziko zaizkie.
Ikusi Gazte Asanblada Sopeloztarrak plazaratutako bideoa:
Gabi Basañezek egindako lana "aitortu" eta "eskertu" arren, Askapenaren kontrako polizia operazioan atxilotutako lagunen askatasuna eskatzeko mozioarekin ez zuen bat egin atzoko udal batzarrean Sopelako EAJk. Jelkideek abstenitzea erabaki zuten, "prozesu judizial bat zabalik" dagoela argudiatuta. "Zer leporatzen dioten ere ez dakigu", adierazi zutenez. "Gakoa horixe bera" dela aurpegiratu zien Guillermo Vio "Willy" zinegotziak. Basañezek euskalgintzan, kulturgintzan, internazionalismoan... egindako lana "guztiz publikoa" izan dela gogoratu zuen ezker abertzalekoak. "Hori da logikoa eta demokratikoa ez dena, epaiketarik gabe espetxean amaitzea. Gabi bertan zen. Ez zegoen joateko arriskurik", salatu zuen Viok. Ezker abertzaleak, EAk, Alternatibak eta Berdeek aurkeztutako mozioa aipatu alderdien babesa jaso zuen. Betiko lez, PSE-EEk eta PPk aurka bozkatu zuten. Igande honetan, manifestazioa egingo dute Sopelan, "Gabi etxean nahi dugu! Errepresio gehiagorik ez!" lelopean. Horrekin ere bat egin dute ezker abertzaleak, EAk, Alternatibak eta Berdeek. Hitzordua ordu batean jarri dute udaletxeko plazan. Bestalde, aurreko egunean Iontxu Etxegarai gazte sopeloztarra espetxeratu izana testuinguru berean kokatu zuen Guillermo Vio "Willy" hautetsi independentistak. Galde-eske txandan, "probokaziotzat eta Euskal Herrian benetako demokrazia eta bakea lortzeko zabaldutako bide berriak suntsitzeko ahalegintzat" jo zuen ezker abertzalekoak. Argazkian, joan den igandean agerraldia egin zuten dozenaka eragile eta norbanakoek Basañezen aldeko manifestaziora deitzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun