Arantza Zulueta, Jon Enparantza eta Iker Sarriegi presoen abokatuak beste zazpi lagunekin batera atxilotu zituen Guardia Zibilak, apirilaren 14an. Horien artean zen Saioa Agirre zornotzarra. Sopelako Zipiriñe ikastetxeko andereñoa eskolak ematen ari zela harrapatu zuten. Hain zuzen, atzo Zornotzan izandako Bizkaiko Bertsolari Txapelketako bigarren finalaurrekoan bertsoa (mp3) eskaini zion bere lehengusinari Eneko Abasolo "Abarkas" iurretarrak. Aipatu sarekadan Erramun Landa Arte Ederretako Fakultateko Pintura irakaslea ere atxilotu zuten, bost egun inkomunikaturik egon ostean libre uzteko.
Bakartze egoera
Ez dago euskal presorik Caceresko espetxean, eta hara bidali zuten Arantza Zulueta lehendabizi. Urriaren 23an, Malagako espetxeko bakartze modulura eraman zuten. Lau orduz atera daiteke patiora, espetxezainak besterik ez ditu ikusten eta miaketak egiten dizkiote egunero. Hasieratik jasaten ari den egoera salatzeko asmoz, gose greba hasi zuen abokatuak azaroaren 15ean. Egoera aldatuko dela hitzeman diotenean, utzi egin du baraualdia.
Arantza Zulueta abokatu presoak azaroaren 15ean hasi zuen gose greba bertan behera utzi du, bere egoerak hobera egingo duela eta beste euskal preso batekin jarriko dutela agindu baitiote, Bilboko Branka agerkari digitalak zabaldu duenez. "Arantza gose greban. Isolamendurik ez, bakartzerik ez!" lelopean, 800 bat lagun elkartu ziren larunbatean Bilbon, Zuluetaren bakartze egoera salatzeko eta aska dezatela eskatzeko. Amaieran heldu zen berria manifestaziora. Abokatuarena "mendeku politikoa" dela azpimarratu zuten amaieran, Lemoizko bizilaguna ere badena presoen eskubideen aldeko lanean aritu delako eta orain hark "hainbeste salatutako eskubide urraketak" berari aplikatu dizkiotelako. Zuluetaren hitzak ere irakurri zituzten manifestazioan: eskerrak eman zizkien bere aldeko ekimenetan izandako guztiei, baina bere egoera ez dela bakarra gogoratu zuen. Bakartuta jarraitzen duten preso guztien alde mobilizatzen jarraitzeko eskatu zuen abokatuak. Argazkia: © Bilboko Branka.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun