Asteburuan hogeita bi mila komiki eta manga zale hurbildu dira Areetara
2010ko aza. 29a, 20:57
Atzo, igandean, amaitu zen Getxoko bederatzigarren Komiki eta Manga Azoka. Hiru egunetan zehar, guztira, 22.000 lagun bertaratu dira antolatutako jarduera anitzetara zein Areetako Xake plazan zeuden 80 salmenta postuetara, Getxoko Kultur Etxeak adierazi duenez. Ohi denez, ospe handiko egileak egon dira bertan. Horiek guztiak hitzaldietan eta aurkezpenetan aritu dira, baita hain arrakastatsuak diren sinatze-txandetan ere. Horrela, zaleek gustuko autoreak zuzenean ezagutzeko aukera izan dute. Aurten Gilbert Shelton, Frederik Peeters eta Stuart Immonen egon dira Areetan, besteak beste. Halaber, aipatzekoa da Antonio Altarriba eta Paco Roca artisten parte-hartzea. Lehenengoari Espainiako Komiki Saria eman berri diote, Kim ilustratzailearekin eginiko "El arte de volar" lanarengatik. Bigarrenak, iaz Espainiako Komiki Saria jaso zuenak, "El invierno del dibujante" bere azken lana aurkeztu du Getxoko Komiki Azokan. Horiekin batera, Ken Niimura, Angel Unzueta eta "El Jueves" aldizkariaren egileetako batzuk ere izan dira ferian. Azken aldizkari hori omendu zuten, bere jarduera dela eta; baita Radio Euskadiren "Pompas de papel" irratsaioa ere, komikiaren mundua hedatzeagatik. Argazkian, Komiki Azokara mozorrotuta hurbildu ohi da jendea / © Getxoko Udala. Erakusketak ez dira falta izan hiru egun hauetan. Aurten zenbait egileren lanaren inguruko mostrak egon dira. Javier de Isusi, Ken Niimura eta Angel Unzuetaren erakusketa monografikoaz gain, Injuve Espainiako Gazteriaren Institutuaren ilustrazio lehiaketan garaile atera diren lanak ere ikusteko aukera izan dute bisitariek. Azkenik, Euskadiko Ilustratzaile Profesionalen Elkarteak (EIPE) eginiko "El Balanzin" aldizkariaren nondik norakoak ezagutzeko tartea ere egon zen Areetako Xake plazako karpan. Halaber, udal erakustaretoetan eta Getxoko zenbait tabernatan komiki erakusketak egon dira. Horietan EIPEren zenbait kideen lanak izan dira ikusgai. Gainera, "El Jueves" umore astekariaren azal onenen erakusketa ere izan da. Bestalde, argitaletxeen eta egileen nobedadeak aurkeztu dituzte azokan. Egunero hitzaldi eta mahai-inguruak izan dira ekitaldi aretoan, baita proiekzioak ere. Mangari dagokionez, jarduera ugari egin zituzten atzo. Genero horren zaleek lehiaketetan eta karaoke saioetan gozatzeko aukera izan zuten
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun