Algortako Fadura kiroldegiko atletismo pista zaharberritzeko lanak azken fasean daude jada. Ekipamendu hori finkatuko duen lurra tratatu eta ateratzeko lanak behin amaituta, hurrengo egunetan euririk egin ezean, behin betiko zoladura zabaldu ahal izango dute. Azken asteotako eurite handien ostean, udal teknikariak bat datoz esatean "beharrezkoa dela aste batzuetan itxarotea emaitza ona izan dadin eta gerora ere zorua konkortzeko arriskua ekiditeko". Alvaro Gonzalez udal zinegotziak tamaldu duenez, "pena da pista berria Itziar Lopez de Uralde Memorialean (abenduak 19) ezin estreinatzea, hain lasterketa herrikoia izanik. Baina, beharrezkoa da emaitza ezin hobea lortzeko eta pista urte askotan disfrutatu ahal izateko". Izan ere, “pista egiteko erabiltzen ari diren materialak maila goreneko lehiaketak hartzen dituzten pistek dituzten berberak dira, eta gure helburua Nazioarteko Atletismo Federazioak Fadurakoa homologatzea da”, aipatu duenez. Uda aurretik atletismo pista irailaren amaierarako egongo zela esan zuten. Argazkian, Alvaro Gonzalez zinegotzia eta Imanol Landa alkatea hainbat kirol azpiegituren proiektuak aurkezten / © Getxoko Udala.
Pista berriaren neurriak nazioarteko mailako pista olinpiko batenak izango dira, 400 metroko barruko kordarekin. Arauzko 8 kaleez gain, 3.000 metroko lasterketa egiteko behar diren hesiak ere izango ditu eta, bederatzigarren kale bat ere beroketa saioak eta footinga egiteko. Horretaz gain, pertika jauzi eta xabalina-jaurtiketarako guneak, luzera jauziak eta jauzi hirukoitzak egiteko bi kale, eta mailu eta disko jaurtiketetarako kaiola izango ditu. Berrikuntza tekniko gisa, pistako kurba baten inguruan hondarrezko zorua izango duen kaiola ipiniko dute pisu-jaurtiketako entrenamendu saioak egiteko. Getxo Kirolak udal erakundeak sustatutako proiektuak 1,3 milioi euroko gastua suposatuko du eta horren %90a Bizkaiko Foru Aldundiak emango du subentzio gisa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun