Sopelako Iberre auzoko bizilagunek parte-hartze prozesua garatu dute urtean zehar, euren iritziak emanda, tokiko hainbat alderdi hobetzeko asmoz. Sopelako Udalak eta Udalsarea 21 erakundeak elkarlanean jardun dute ekimen horretan. Guztira, 134 auzokidek parte hartu dute kontsultan eta 300 proposamen baino gehiago jaso dira, udal iturriek aipatu dutenez. Tokiko agintariek joan den asteazkenean aurkeztu zioten Iberreko bizilagunei, zonalderako ekintza proposamena, "herritarren ekarpenak kontutan hartuta". Auzotakideek eurek eztabaidatu zuten egitasmoa, behin betiko onartu aurretik, publikoki aurkeztu eta iradokizun berriak biltzeko helburuarekin. Udalak adierazi duenez, etorkizunean ere herritarren parte-hartzea sustatuko dute, udalerriko hainbat kale hobetzeko asmoz. Gauzak horrela, hurrengoak Sertutxa eta Iñaki Deuna kaleak izango dira. Argazkian, asteazkenean egindako batzarraren irudi bat / © Sopelako Udala.
Iberreko bizilagunen proposamenak jasotzeko karpa bat jarri zuten auzoan bertan. Ingurua hobetzeko har litezkeen neurriei buruz galdetu zitzaien. Beste batzuen artean, proposatutako ekintzen ildoak ondokoak izan ziren: garbiketa eta hondakinak, irisgarritasuna, segurtasuna, trafikoa eta aparkalekuak zonalde publikoetan. Bildutako ekarpenen artean, Lemotza errekaren ubidea garbi mantentzea eta berregokitzea dago. Hala ere, dagoeneko hori eginda dagoela erantzun du Sopelako Udalak. Iberreko auzotarrak kezkatzen dituen beste gai bat txakurren gorotzak dira. Ildo horretan, Udalak "Sopela garbi nahi dut" lelopeko kanpaina jarri du abian, arazo horri aurre egin eta animalien jabeak sentsibilizatzeko. Auzoak duen irisgarritasuna ere herritarren artean kezka pizten duen beste gai bat da, eta, horrekin batera, auzokideek Iberreko aldapa hobetzea eta oinezkoentzako espaloi eta igarobideak egokitzea eskatu dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun