Zabalako gurasoen elkarteko Laura Lapeyrak jasoko du bihar Getxoko lehenengo Euskara Saria
Laura Lapeyra Lasak jasoko du Getxoko Udalak lehenengo aldiz emango duen Euskara Saria. Gure hizkuntzaren erabileraren alde, aipatu andreak azken urteotan Algortako Juan Bautista Zabala herri ikastetxeko gurasoen elkartean egindako lana eskertuko dute horrela, tokiko iturriek zehaztu dutenez. Saria Luis Artola artisauak egindako obra izango da eta Imanol Landa alkateak emango dio bihar emakumeari, 20:00etan, udaletxeko batzar aretoan izango den ekitaldi publikoan. Laura Lapeyrak 41 urte ditu. Eibarren jaio zen, baina zortzi urte daramatza Algortan bizitzen. Zabala eskolan ikasten ari diren 10, 8 eta 6 urtetako hiru alaben ama da eta bertoko gurasoen elkartean dihardu, umeek euren eguneroko bizitzan euskara erabil dezaten. “Bertara heldu nintzenean harrituta geratu nintzen ikasgeletatik kanpoko harremanak gazteleraz zirela ikustean. Ni Eibarren euskaraz mintzatzen entzutera ohituta nengoen”, aipatu duenez. Argazkian, hainbat ume Zabala ikastetxean, Bapirukeren jarduerez gozatzen.
Sariak ustekabean harrapatu du Laura, “horrelako bat normalean pertsona ezagunei ematen zaielako". "Kasu honetan, niri, ezezagun bati, eman izana, euskararen erabileraren alde lan anonimo handia egiten dutenen errekonozimendutzat hartzen dut”, nabarmendu du auzokideak. “Oso pozik eta oso urduri nago. Saria lanean segitzeko bultzada da”, amaitu du Laurak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun