"Como no quererte, Alba" izenburua dauka Iñaki Gonzalo Casal "Kitxu" Itzubaltzeta / Romoko euskal preso politikoak argitaratu duen azken liburua. Aipatu lanak martxoan ikusi zuen argia. Lan horretan, El Salvadorren hil zuten Begoña Garcia Arandigoyen "Alba" euskal brigadistari buruz dihardu. 1990eko irailaren 10ean zauritu zuten Nafarroako Gares herriko mediku gaztea, FMLNren eta El Salvadorko armadaren arteko liskarrean. "Bertsio ofizialaren arabera, tiroketaren ondorioz hil zen euskal brigadista. Baina, errealitatea bestelakoa da: Alba zauritu eta bizirik harrapatu zuten soldadu salvadortarrek. Gero, bortxatu egin zuten, torturatu, eta garondoan tiroa emanez exekutatu zuten", Gonzalok liburuan kontatzen duenez. Aurretik, sakabanaketako ziegetan beste bost liburu ere argitaratu ditu itzubaltzetarrak: "Carta a un fantasma", "Nadine", "La barca de Amin" eta "El niño de Maguey" Txalaparta etxean, eta "Hace frio aqui en España", Hiru etxean. "Ataramiñe" bildumetan ere hainbat idatzi argitaratu ditu, "Bilal Bakaliren ametsa" izenburuko azkena kasu.
Ihes egiteko
Iñaki Gonzalo Casal "Kitxu" euskal preso politikoa Algortan jaio zen, 1964ean. Kazetaritzan lizentziatua, gaur egun espetxean Filosofia egiten ari da. Kazetari lanetan, "Punto y Hora" aldizkarian jardun zuen, gero Getxo Irratian (Getxoko Udal irratia) eta "Egin" egunkarian ere lan egingo zuen, 1994ean Espainiako poliziak atxilotu zuenean. Espetxean zegoela, Getxoko zinegotzi aukeratu zuten. Hainbat espetxetatik pasa da, eta 1998tik 2010eko ekainera arte Duenas-eko (Palentzia) espetxean egon da. Orain Valladoliden daukate. Behin zergatik idazten zuen galdetu eta honela erantzun zuen: “idazteko grina barru-barruan dudalako eta egunero bizi behar izaten dudan errealitate beltz eta ilun honetatik ihes egiteko ez dudalako orain arte beste era hobeagorik aurkitu”.
Iñaki Gonzalo preso itzubaltzetarraren azken lana irakur daiteke "Ataramiñe" berrian
"Ataramiñe 10" izenburuko liburua aurkeztu zuten, atzo goizean, Bilboko Kalderapeko kulturgunean. Frantziako eta Espainiako kartzeletan sakabanatutako 20 euskal preso politikoen lanak biltzen ditu aurtengo bildumak. Horien artean, Iñaki Gonzalo Casal "Kitxu" Itzubaltzeta / Romoko gatibuaren euskarazko idatzi bat irakur daiteke; "Bilal Bakaliren ametsa" izenburuko lana, alegia. Bihar, osteguna, Iruñean, Mikel Orbegozo euskal preso politiko donostiarraren "Preso nago" komiki-liburua ere aurkeztuko du Ataramiñek. Durangoko Liburu eta Disko Azokan ere emango dute aipatu bi argitalpenek berri astelehenean, abenduak 6, 10:30ean, Landako guneko bigarren karpan. Biak ala biak Ataramiñeren stand-ean egongo dira salgai. Argazkian, herritar bat Iñaki Gonzaloren argazkiari eusten.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun