Bihar, osteguna, Aljeria aldera, Tindouf-eko "Otsailak 27" kanpamendura abiatuko dira Leioako 14 eta 18 urte bitarteko hamabi neska-mutil. Bertan, Mendebaldeko Saharako biztanleak eta kultura ezagutzeko aukera izango dute. Gazte horiek, zortzi egunetan zehar egongo dira kanpamenduan, hango familiekin bizitzen eta saharar kultura eta bizimodua ezagutzen. Ekimen hori, Leioako Udaleko Gizartekintza eta Hezkuntza Sailak bideratutako frogazko proiektua da. "Bidaia oso berezia izango da. Izan ere, neska-mutilek gauza asko ikasteko eta ikusteko aukera izango dute, euren ezagutza maila handitzeko asmoz", azaldu dute udal iturriek. Gazte leioaztarrak hainbat ikastetxeetakoak dira: Mercedarias, Romo-Artatza institutua, Barandiaran eta Lanbide Heziketakoak, hurrenez hurren. Guztiek sei urte baino gehiago daramatzate Ekotaldeetan lan egiten, hau da, Herrigune proiektuko ekintza boluntarioetan. Gauzak horrela, bidai horrekin, ikasleek azken urte hauetan egindako lana eskertu nahi du Udalak. Argazkian, Leioan uda igaro duten Saharako bost umeetako bi / © Leioa.net.
Saharan izango diren egunetan, momentu oro, Solasguneko eta Fath elkarteko bina kiderekin egongo dira neska-mutilak. Saharar familietan taldeka banatuko dituzte: hiru-lau gazte eta aipatu begiraleetako bat. Bihar, ostegunean, abiatuko dira kanpamendura, 19:30ean; eta abenduaren 10ean bueltatuko dira. Bertan, saharar gazteekin eta nagusiekin hainbat ekintzetan parte hartuko dute. Eurek proposatutako ekintzak honakoak dira: Leioa-Sahara futbol partidua, emakumeen prestakuntzaz arduratzen den zentrora bisita, saharar festa, gure hizkuntza eta ohiturak konpartitzea; eta orokorrean, saharar errefuxiatuen egoera politikoa, errealitatea eta bizi baldintzak gertutik ezagutzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun