Eskualdeko bederatzi norbanakok eta kolektibok jaso dute Hemendik Saria
2010ko abe. 2a, 15:04
Sopelako Kurtzio kultur etxeak itxura ezin hobea eman zuen atzo, asteazkena, Eskuinalde mailako Deia Hemendik Sarien banaketa hartzeko. Areto nagusia bete-beteta egon zen eta giroa aparta izan zen. Xabier Lapitz Onda Vasca irratiko esatari ezagunak zuzendu zuen ekitaldia. Bestalde, Xabi Aburruzaga trikitilariak jarri zion musika sari banaketari, "Denboran naufrago" bere azken laneko kantekin, Jose Urrejola musikariaren konpainian. Golardoei dagokienez, Kultura Saria, Leioako musika eskolak jaso zuen; Kirol Saria, Berangoko Nazioarteko Miliak; Gizarte Ekintza Saria, Sopelako Aitxu! euskara taldeak eta Algortako Portu Zaharreko Karitateko Alaben ordenako monjek; Sustapen Ekonomikoa Saria, Getxo Enpresa eta Merkataritza (GEEM) elkarteak; Berrikuntza Saria, Areetako Sener armagintza enpresak; Turismo Saria, Urdulizko Adela Andikoetxea baserritarrak; eta Omenaldi Saria, Angel Lizaur "Aita Gotzon" Barrikako parrokoa zenak eta Gorlizko Jose Luis Arriaga "Roni"-k. Argazkian, Portu Zaharreko monjek eta Aitxu! euskara taldeak Imanol Landa eta Imanol Garai Getxo eta Sopelako alkateen eskutik jaso zituzten sariak / © Sopelana.net.Arlo guztietako pertsona ezagunak bildu ziren sari banaketan. Bertan izan ziren Imanol Garai Sopelako alkatea, Josu Landaluze alkateordea, Naiara Ibarzabal Turismo eta Komunikazio zinegotzia, Leire Basauri Kultur zinegotzia eta Gonzalo Garcia Giza Baliabideen zinegotzia. Horiekin batera egon ziren Uribe Kostako udal guztietako ordezkariak. Ez zioten hitzorduari hutsik egin Jose Luis Bilbao Bizkaiko ahaldun nagusiak, Ana Madariaga Batzar Nagusietako presidenteak, Mikel Arieta-Araunabeña Bilboko Merkataritza Ganberako zuzendariak eta Iñigo Camino "Deia" egunkariko zuzendariak. Bestalde, han izan ziren Iñaki Perurena harri-jasotzailea eta Fede Etxabe txirrindulari ohia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun