Gizon gazte bat atxilotu dute Getxo udalerrian dozena bat lapurreta egin dituelakoan
2010ko abe. 3a, 20:09
Gaur goizaldean, 26 urteko gizon bat atxilotu du Areetan Ertzaintzak, elektrotresna denda batean lapurtu duelakoan. Eusko Jaurlaritzaren Herrizaingo Sailak zabaldutako bertsioaren arabera, gizonezkoa saltokiaren erakusleihoa apurtu du hainbat telebista bereganatzeko. Particular de Coste kalean harrapatu dute, aparailuetako bat gainean zeramala. Polizia iturriek azken hilabeteotan Getxo udalerrian egindako beste hamaika lapurreta egozten dizkiote atxilotutakoari. Kasu gehienetan estolda tapa bat erabili du lapurrak, lokaletako leihoak edota ateak apurtzeko. Gainera, irailean adineko andre bati Areetan eginiko indarrezko lapurreta ere leporatzen diote. Azaroaren 9tik Getxo udalerrian izandako hamaika lapurreta ikertzen ibili da azken aldian Ertzaintza. Guzti horiek egoera antzekoetan jazo dira: goizaldean eta kutxatila zein estolda tapa batekin leihoak apurtuta. Lapurrak lokaleko dirua, aparailu elektronikoak eta informatikoak eraman ditu, besteak beste. Hori dela eta, Ertzaintzak zaintza dispositiboa ezarri zuen lokal komertzialen inguruetan. Gauzak horrela, gaur goizaldeko 2:30ak aldera, etxetresna elektrikoen denda batean gertatzen ari zen lapurreta baten berri izan dute. Polizia patruila bat tokira bertaratu eta, lokaleko kristala apurtuta ikusi ostean, ingurua ikuskatu egin dute. Jarraian, Areetako Particular de Coste kalean telebista gainean zeraman gizonezko bat ikusi dute. Polizien presentzia sumatzean, ustezko lapurrak ihesean hasi da. Hala ere, polizia iturriek adierazi dutenez, inguruko zuhaixka baten atzean topatu dute. Ondoren, atxilo eraman ostean, aurreko hamaika lapurreten egilea izan dela ondorioztatu dute poliziek; baita irailaren 1ean Areetan adin nagusiko andre bati eginiko indarrezko lapurretarena ere. Horretan, ustezko lapurrak, etxebizitza eraikin bateko igogailu batera sartu zen andrea bertan zegoela. Orduan, indarrez tira eginda urrezko hainbat lepoko eraman zituen. Hurrengo orduetan epailearen esku utziko dute gizonezkoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun