Wanted lehiaketako "Norabide guztiak" dokumentala proiektatuko dute ostiralean Areetan
Getxoko Udaleko Gazteria Zerbitzuak antolatutako 2009ko Wanted ideia lehiaketa irabazi zuen "Norabide guztiak" ikus-entzunezkoa ostiral honetan, hilak 10, estreinatuko dute Areetako Andres Isasi Udal Musika Eskolan, arratsaldeko zazpietan. Dokumentalaren aurrestreinaldia joan den urrian izan zen Algortako Fadura kiroldegian, SozialHitz Etorkinen eta Giza eskubideen inguruko topaketaren barruan. Proiektua Leire Muñozek eta Cristian Villavicenciok gauzatu dute, Arte Ederretako lizentziatua eta ikaslea, hurrenez hurren. Bikote horren lanean adin eta jatorri desberdinetako Algortako Fadura institutuko DBHko ikasleen bizimodua erakusten da. "Hainbat egoeren bitartez, egunez egunekoak oso ikuskera aberatsa erakusten du, eta horrek, kultur aniztasuna zeharka lantzeko aukera eskaintzen du", adierazi dute autoreek. Argazkian, dokumentalaren pasarteetako bat / © Getxoko Udala.
"Nerabetasunak bizitzan une garrantzitsua dela ere agerian uzten du, baita hezkuntza zentroak denborarekin ez direla horrenbeste aldatu ere. Adibidez, honako egoera hauek ikus daitezke: antzerkiko klase baten garapena; matematikako klase bat; 15 urtekoentzako jaia, hau da, alabak gizartean aurkezteko Hego Amerikako ohiko ospakizuna; ikasle batzuen rock kontzertua; lorezaintzako proiektua, partaidetza anitzarekin; edo atzerriko ikasleentzat euskara sendotzeko egoten diren klase horietako bat”, zehaztu dute egileek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun