Berrikuntza lanak bukatuta, Sopelako udal pilotalekua erakutsi zieten kazetariei ostiral eguerdian Imanol Garai alkateak, Josu Landaluze alkateordeak, Leire Basauri Kultura eta Kirol zinegotziak eta Naiara Ibarzabal Turismo eta Komunikazio zinegotziak. Udal agintariak jende guztiari gonbita egin zion frontoiaz gozatzeko, “denon artean hain gurea den kirol honi beharrezko duen indarra emateko”. Hala ere, gauean helduko zen pilotalekua berrinauguratzeko ekitaldi handia. 22:15etik aurrera, eskupilota jaialdia jokatu zuten bertan. Apezetxea-Larrinaga eta Cabrerizo II-Cecilio bikoteen arteko norgehiagokan, 22-15 irabazi zuten lehenengoek. Bigarrenean, 22-14 nagusitu zitzaizkien Titin III eta Laskurain pilotariek Gonzalez eta Zubietari. ETB1 telebista kateak eskaini zituen partida biak. Argazkian, Imanol Garai Sopelako alkatea frontoian egindako berrikuntzen xehetasunak ematen / © Sopelako Udala.
Sopelako udal pilotalekua herrigunean dago, udaletxeko plaza ondoko errepidea igarota. 1990ean eraiki zuten eta gaur egun arte ez da zaharberritzeko lanik egin. Zazpi hilabeteetako obren ondoren alderdi desberdinak berritu dira. Horrela, ezker pareta eta erreboteko zonaldea konpondu egin dute. Halaber, hormak urdin kolorez margotu dituzte. "Horrek pilotaren jarraipena hobetzen du, partidetan", udal arduradunen arabera. Marrak eta txapa, beren aldetik, hori kolorez margotu dira. "Horrenbestez, frontoiaren koloreak Sopelako ikurrinaren berberak dira", nabarmendu dutenez. Harmailetan ere zaindu dute alderdi bisuala. Eserleku berriak jarri dituzte, ergonomikoak eta erosoagoak, urdinak eta horiak. Denera, 428 lagunek ikusi ahal izango dituzte pilota partidak, eserita. Bestalde, pilotaleku azpiko zonaldea guztiz berregokitu dute. Gimnasioa edo erabilera anitzeko gela handitu eta zaharberritu dute, baita aldagelen zonaldea egokitu ere.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun