Metro Bilbao garraio enpresak "erabat neurrigabetzat" jo ditu Gabonetarako deitutako lanuzteak
Metro Bilbao garraio enpresak "erabat neurrigabetzat" jo ditu abenduaren 21etik 25era bitartean aurreikusita dauden lanuzteak. Era berean, "Bizkaiko gizarte osoarentzat iraingarriak" direla adierazi du. "Izan ere, San Tomas egunean soilik 150.000 bidaiariri eragingo zaie, gutxi gorabehera", Metro Bilbaoko arduradunen arabera. Hurrengo greba jardunaldietan, berriz, "eguneko 70.000 bidaiariri eragingo litzaieke". Euskal Herriko Kontsumitzaileen Antolakundeak (EKA) bere aldetik, "gehiegizkotzat" jo ditu lanuzteak, "Gabon gauean aipatu zerbitzua beharrezkoa delako". Enpresa batzordeak abenduaren 21ean, Santo Tomas egunean, goizez eta arratsaldez bi orduko geldialdia egitea erabaki du, ELA, LAB, CIM eta ESK sindikatuaren babesarekin. Horrez gain, hilaren 22, 23 eta 24an, goizean eta arratsaldean, ordubeteko geldialdia egitera deitu ditu langileak enpresa batzordeak. Eguberri egunerako, berriz, lanuzteak sindikatu guztien babesa jaso du, baita CCOO eta UGT sindikatuena ere. Egun horretarako, geldialdia gauerditik goizeko 10:15era arte izango da. Argazkian, greba eguna Metro Bilbao garraio enpresan / cc-by-sa Koska irratia.
Metro Bilbao garraio enpresako Zuzendaritzaren arabera, "indarreko hitzarmen kolektiboak ez dio erakundeari Gabon gaueko zerbitzua antolatzea eragozten, bere garaian Gabon Zaharreko zerbitzuarekin gertatu zen bezala". Bestalde, "oraindik ere enpresa batzordearekin adostasunera iristeko borondatea duela" adierazi du. Hain zuzen ere, Metro Bilbaoko arduradunek sindikatuei egotzi diete "negoziatzeari uko egitea". "Gure asmoa ahalik eta langile gutxienei eragitea da eta, ahal dela, boluntarioekin egitea. Estali beharreko orduen tarteak gau horretan 30 bat langile aritzea eskatzen du", aipatu dutenez. Bitartean, "hausnarketa egin eta enpresarekin dituzten tirabirak herritar guztiei kalte egin barik konpontzea" eskatu die sindikatuei Euskal Herriko Kontsumitzaileen Antolakundeak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun