Igande honetan, hilak 12, urteroko gala egingo du Algortako Bertsolari Eskolak (ALBE). Bertsolaritzaren alde egindako ibilbidea saritzeko, beren-beregi, Aitor Zumalabe diseinatzaile bilbotarrak sortutako Ahobi sariak banatuko dituzte aipatu ekitaldian, orain hamar urte hasitako ohiturarekin jarraituz. Aurtengoa, baina, jaialdi berezia izango da, ALBEkoek nabarmendu dutenez. Trino Azkoitiak eta Joseba Santxok jasoko dute Ahobi sari bana, duela 30 urte Algortako Bertsolari Eskola sortu zutenean ekin zioten lanari merezi duen aitortza eginez. Jaialdia Algortako Kasinoan (Basagoiti Etorbidea, 47) izango da, 19:00etatik aurrera. Besteak beste, Maialen Lujanbiok, Andoni Egañak, Sustrai Kolinak eta Jon Maiak eskainiko dute bertso saioa. Horretaz gain, Gibel Urdinak musika taldearen emanaldia eta hamaika sorpresa gehiago izango dira. Argazkian, Ahobi saria / © ALBE.
ALBEren sorrera 1980an gertatu zen. Urte hartan, Trino Azkoitia Azpitarte Azkoitiako seme getxoztartuak (lan kontuengatik) eta Andoni Iriondo Barrenetxea Mendaroko seme getxoztartuak (getxoztar batekin bertora ezkondua) elkar ezagutu zuten, halabeharrez, Bilboko Erakustazokan euskararen alde egin zen jaialdi batean. Bestalde, Joseba Santxok 47 urte ditu. Euskal Filologian lizentziaduna da eta gaur egun doktoretza prestatzen dabil. Euskal etimologia du ikergai. Zubia argitaletxeko zuzendaria ere bada. 1993tik Txapelketa Nagusi guztietan izan da epailea. Algortako Bertsolari Eskolan hasiera-hasieratik lanean aritu zen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun