Azoka 10:00etan zabaldu eta ordu bete beranduago trikitilari eta txistularien doinuekin girotuko dute. Ordu horretan, Errekalde plaza txikientzako topagune izango da, hainbat tailer eta ponien ibilbideak egongo baitira. Bestalde, toki berean, harri jasotzaile eta aizkolari erakustaldiak egongo dira. 12:00ak aldera, “Leioako Elizateko Udala” izeneko lehiaketaren 12. edizioaren txanda izango da. Horretan, Idiazabal Jatorrizko Izendura duen Bizkaiko gaztarik onena sarituko dute. Ordu berean, Jose Ramon Aketxe plazan, azokako produktuen dastatzea izango da, Eusko Labela duen Lumagorri oilaskoa protagonista izango dela.
Eguerdiko ordu batean, Bulebarrean, animaliei buruzko azalpenak emango dira eta arraza bakoitza zein den eta ze ezaugarri dituen azalduko zaie herritarrei. Ordu bete beranduago, momenturik garrantzitsuena helduko da, Leioako nekazari bati omenaldia egingo baitzaio. Horren ostean, gazta lehiaketaren sari banaketa izango da eta azokaren girotzean eta dekorazioan parte hartzen dutenen sailkapena ere publiko egingo da.
Olentzero eta Mari Domingi
Olentzerok eta Mari Domingik ere bisitatuko dute igandean Leioako Nekazari eta Abeltzaintza Azoka. Berbalamiñe tokiko euskara elkartearen postuan egongo dira eguerdiko 12:30ean. Bertan, ikazkin zaharraren figurak, gabon kanten bilduma eta kamiseta ederrak eskuratzeko aukera egongo da, baita pintxo bero eta goxoak dastatzeko ere. Gainera, umeek euren gutunak Olentzero edota Mari Domingiri zuzenean eman ahal izango diete.
Nekazari giroak beteko du igandean Leioa
2010ko abe. 10a, 12:22
Leioak bere nekazari sustraietara salto egingo du igande honetan herriaren erdigunean egingo duten Nekazari eta Abeltzaintza Azokaren 23. edizioaren bitartez. Ospakizun berezi horrek gero eta bisitari gehiago biltzen ditu, batez ere Bulebarrean eta Errekalde plazan, udal iturriek adierazi dutenez. "Gure lurrak emandako produkturik onenak dastatzeko edo erosteko etortzen dira, edota gure sustraien giro onaz gozatzeko", gaineratu dute. Horrenbestez, 10:00etatik 15:00etara, Euskal Herriko hainbat toki desberdinetik etorritako 90 ekoizle baino gehiagoren produktuak egongo dira ikusgai. Bestalde, betiko arraza eta animaliak izango dira Leioan. Guztira ehun buru inguru, hauen artean: behiak (pirenaikoak, blondak, limusinak, frisiarrak, txarolesak eta misotak), idiak, zaldiak, poniak, astoak eta hegaztiak. Horretaz gain, animali bakoitza bere jabeekin izango da, gehienak hainbat sarien irabazleak. Argazkian, abelburuak ere izango dira Leioako Nekazari eta Abeltzaintza Azokan / © Leioa.net.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun