Igandean, urteroko gobernuz kanpoko erakundeen (GKE) azoka egingo dute. Berritasun bezala, Txu-txu tren batek Areetako kaleak zeharkatuko ditu herritarrak karpara hurbiltzera animatzeko. Jardueren artean, txapen eta birziklapen tailerrak izango dira, pailazoak eta bidezko merkataritza produktuen dastaketa.
Astelehen goizean, Lehen Hezkuntzako 200 bat ikaslek herrien garapenean urak daukan garrantziari buruz egindako lanak aurkeztuko dituzte. Horiek Zabalketa GKE getxoztarraren "Zabaldu Mundura" proiektuaren barrukoak dira eta honako hauek parte hartzen dute: Nuestra Señora de Europa, Larrañazubi, San Inazio, Azkorri, Madre del Divino Pastor, Gobela Ikastola eta Gaztelueta.
Jarduera iraunkorrak
Jarduera iraunkorren artean 2009an subentzionatutako proiektuei buruzko bi panel izango dira; karpatik egin daitekeen ibilbideari esker Getxok munduari eta munduak Getxori ematen diotenari buruzko hausnarketa egin ahal izango da; genero jolasak, ludoketa eta bi erakusketa ikusi ahal izango dira. Lehenengoa, Medicus Mundi taldearena da malariari buruzkoa eta bestea Unesco Etxearena, klima aldaketaren gainekoa. Erakusketa hori, karpapeko jarduerak amaitutakoan, Gobela kiroldegian izango da ikusgai, abenduaren 14tik 30era bitartean. Erakusketa zein abenduaren 21ean klima aldaketa eta lankidetzari buruz izango den jardunaldia joan den urrian Getxon martxan jarritako proiektu aitzindariaren partea dira. Horren asmoa da klima aldaketak herrien garapenean duen garrantziaz herritarrak kontzientziatzea.
Abenduaren 11tik 13ra “Getxotik Mundura-Mundutik Getxora” lankidetza topaketen 13. edizioa egingo dute Areetako Xake plazan. Horrenbestez, bihar, larunbata, Sahararen Eguna izango da Atfal elkarte getxoztarrak antolatuta. Besteak beste, 12:00etarako, Marokok saharar herriari eragindako erasoengatik protestatzeko elkarretaratzea deitu dute karparen kanpoaldean. 13:30ean, berriz, haur antzezkizuna izango da eta, arratsaldean, jolas ez sexisten tailerra eta musika ikuskizuna. Tailerrak (henna, iltze-belar, haurrentzako makillatzaileak...), argazkien erakusketa eta te dastaketa ere ez dira faltako. “Aurten egun berezia izango da, saharar herriak bizi duen egoeragatik, batez ere Marrokok azken asteetan eragindako indarkeria egoerengatik. Beste aukera bat izango dugu herri horren egoera bertatik bertara ezagutzeko, elkartasuna agertzeko eta pairatutako indarkeriagatik protestatzeko”, azpimarratu du Begoña Ezkurra zinegotziak. Argazkian, azken urteotan udan Getxora etorritako haurretako bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun