“Xabi, Alfon eta beste euskal preso eta iheslariak etxera!” lelopean, igande honetan, abenduak 12, mendi martxa egingo dute Gorliztik Armintzara, Plentziako ezker abertzaleak bere bitakoran jakinarazi duenez. Horren bitartez, Alacant aldean preso daukaten Xabier de la Maza gazte gorliztarra eta Afrikako Sao Tome uharte txikian erbesteratuta dagoen Alfonso Etxegarai plentziarra “pausoz pauso euren herrietara hurbildu” nahi dituzte. Goizeko 10:30ean abiatuko dira Astondoko kaitik. Armintzara helduta, berriz, triki-poteoa egingo dute. Azkenik, 14:00etatik aurrera, bazkaria izango dute frontoian. Hori bai, bakoitzak bere janaria eraman beharko du eta denon artean konpartituko dute, antolatzaileek azaldu dutenez. Argazkian, Xabier de la Maza Peña Gorlizko euskal preso politiko gaztearen aldeko pankarta Plentzian / © Plentzia, Gorliz eta Lemoizko ezker abertzalea.
Xabi de la Maza gazte gorliztarra 2009ko abenduaren 18an atxilotu zuen Espainiako Poliziak, azaroan burututako 34 gazteen aurkako sarekadarekin lotura zuelakoan. Hiru egunez inkomunikaturik egon ondoren, Fernando Grande-Marlaska Auzitegi Nazionaleko epaileak espetxera bidali zuen. Inkomunikazioa altxatu ostean, poliziaren esku egondako egunetan etengabeko mehatxuak eta irainak jasan zituela salatu zuen mutilak. Egun, Alacant aldeko Fontcalent espetxean daukate, Gorlizetik 825 bat kilometrotara, autoz joateko. Alfonso Etxegarai plentziarrak, berriz, 25 urte bete ditu aurten deserrian. 1986ko abuztuaren 14tik dago munduko herrialderik txiroenetakoa den Sao Tome eta Principeko Errepublika Demokratikoan, Gineako Golkoko 1.001 kilometro koadroko eta 160.000 bat biztanleko herrialdean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun