Udaltzaingoaren presentzia nabarmen ugarituko da Gabonetan Leioan
2010ko abe. 11a, 20:27
Gabonekin batera, zaintza kanpaina berezia jarriko du martxan Leioako Udalak, herriko denden segurtasuna bermatzeko. Tokiko erakundeak adierazi duenez, "egun horietan salmenta gehiago izaten dira. Beraz, urteko beste sasoi batzuetan baino diru gehiago biltzen da, jostailu, bitxi, janari eta opari saltokietan batez ere". Lapurretak gertatzeko "egoera erakargarria" izan daitekeenez, udaltzainen presentzia nabariagoa izango dela jakinarazi dute udal agintariek, "batez ere dendak dauden guneetan". Gainera, "arrisku egoeran" daudela uste duten dendariak Leioako Udaltzaingoarekin harremanetan jarri ahal izango dira, arreta berezia jasotzeko. Bestalde, Udaltzaingoaren eta dendarien arteko komunikazioa hobeagoa eta zuzenagoa izan dadin, SMS zerbitzua ezarri berri da. Horren bidez, tokiko poliziek herrian edo inguruan gertatu diren lapurreten berri emango diete zerrendan dauden dendariei. Argazkian, Leioako Udaltzaingoa / © Leioa.net.Non izan den eta lapurretaren edo lapurren ezaugarrien berri emango dute, beste xehetasun batzuen artean. Zerbitzu hori izateko interesa duten dendariek izena emateko inprimakia bete dezakete Udaltzaingoan, edo Leioako Udalaren webgunetik deskargatu. Ondoren, Udaltzaingoaren bulegoetan entregatu behar da. Leioako Merkatarien Elkarteko kide diren dendek elkartearen bidez eman ahal izango dute izena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun