Aurreikuspenen arabera, bi mila atleta inguru lehiatuko dira igande honetan, hilak 19, Getxo udalerrian barrena egingo duten Itziar Lopez de Uralderen Oroimenezko Lasterketaren 27. edizioan. Lehendabiziko aldiz, Itxartu talde algortarrak hartu du probaren antolaketaren ardura, Getxo Atletismo Taldearen laguntzaz. Dagoeneko izena eman duten korrikalarien artean, Elijah Muturi kenyarra, Donostiako azken Maratoiaren irabazlea; eta Lucy Karimi etiopiarra daudela nabarmendu dute antolatzaileek, gaurko prentsaurrekoan. Agerraldian, Eduardo Txopitea lasterketa horren antolatzaile eta arima zena oroitu dute bereziki. Memorialak bi proba ditu: bata testigantzazkoa, lehiakorra ez dena, bi kilometrotakoa; eta bigarrena, lehiakorra dena, memoriala bera, bederatzi kilometrotakoa. Lehenengoa 10:30ean hasiko da eta, ordu erdi beranduago, 11:00etan bigarrena; bien irteera eta helmuga, Algortako Fadura udal kiroldegian izango dela. Argazkian, gaurko aurkezpena / © Getxoko Udala.
Getxo Atletismo Taldeko arduradun eta probaren antolatzaile Dimas Ramosek adierazi du, aipatutakoekin batera, beste goi maila atleta batzuk izango direla: David Garcia, Iñigo de la Granja, Iraia Garcia eta Leire Medina, besteak beste. Bitartean, Alvaro Gonzalez Kirol zinegotziak tamaldu du “Faduran egiten ari garen atletismo pista berria Itziar Lopez de Uralde bezalako atletismo proba hain herrikoiarekin estreinatu ahal ez izatea, euriak zabaltzea atzeratu baitu, nahiz eta laster amaituta izatea espero dugun”. Sariei dagokienez, antolakuntzak lehen sari nagusi bat emango du, 600 eurokoa, eta 600 euro gehiago irabazleak Tadeo Nadak lortutako 26 minutu eta 31 segundoko marka hausten badu. Emakumezkoen artean lehenengoak ere 600 euro jasoko ditu, eta 600 euro gehiago Marta Tigabeak lortutako 30 minutu eta 20 segundoko marka hautsiz gero. Horrez gainera, oroitzapenezko dominak izango dira helmugara iristen direnentzat, garaikurrak kategoria bakoitzean lehen postuan iristen direnentzat, kamisetak, kirol materiala eta beste opari batzuk. Izen-ematea doakoa da eta ostegun honetara arte, hilak 16ra arte, egin ahal izango da itxartu.itxartu[abildua]gmail.com helbide elektronikoan, Getxo Kirolak udal erakundean, Bizkaiko Atletismo Federakundean bertan eta herrialdeko kirol saltoki batzuetan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun