Espedizioak sei etapatan nabigatuko du munduaren inguruan. EHUko taldeak hiru etapatan parte hartuko du. Lehenengoan, Cadizetik Rio de Janeirorakoan (Brasil), Iñigo Azua irakaslea egongo da itsasontzian. Bigarrenean, Rio de Janeirotik Lurmutur Hirirakoan (Hegoafrika), Begoña Ayo irakaslea joango da; eta azkenekoan, Cartagena de Indiasetik Cadizerakoan, Zuriñe Baña ikertzailea. Marian Unanue eta Itxaso Artolozaga irakasleek ere proiektuan parte hartuko dute, lehorretik.
Sei etapa horietan, ikertzaileek ozeano sakoneko ur-laginak bilduko dituzte (5.000 metroraino), ibilbidean aurrez ezarritako 180 gunetan. Lagin horiekin egingo dituzten ikerketek ozeano sakoneko izaki bizidunak hobeto ezagutzeko aukera emango digute. "Ozeanoaren azaleko aldea bakarrik ezagutzen dugu, argiztatuta dauden lehen 200 metroak, gutxi gorabehera. Hortik beherakoari buruz ezer gutxi dakigu", adierazi du Iriberrik. Zehazkiago esanda, proiektuaren helburua ozeano sakoneko biodibertsitatea genomikaren eta metagenomikaren ikuspegitik ezagutzea da. "Hamarnaka milioi gene berri aurkitzea aurreikusi dugu, eta aintzat hartu behar dira horrek etorkizuneko ikerketei dagokienez ekarriko dituen ondorioak. Kontuan hartu behar dugu gene bakoitza proteina baten adierazpena dela, eta erabilgarria izan daitekeela medikuntzan, elikaduran edo bioteknologian", erantsi du.
Biodibertsitatea eta Mikrobiar Prozesuak
Espedizioan parte hartuko duten taldeak hamaika ikerketa-arlotan banatu dira. EHUko taldea Biodibertsitatea eta Mikrobiar Prozesuak arloan dago, eta munduko ozeanoetan, bereziki ozeano sakonean, zer mikroorganismo dauden eta zer portaera duten ikertzeaz arduratuko da. Arlo horretan bederatzi erakundetako 30 ikertzaile arituko dira lanean bidai osoan eta erabateko elkarlana izango dute oinarri. "Espainiako ikerketa ozeanografikoan kalitate handia dago, baina baita sakabanaketa eta alferrikako ahalegina ere, elkarlana ez egiteagatik. Proiektu honen beste helburu bat ahaleginak batu eta emaitza gehiago eta baliotsuagoak lortzea izango da", adierazi du irakasleak.
Espedizioa 2011ko uztailean amaituko bada ere, proiektuak aurrera jarraituko du, jasotako laginak abiapuntu hartuta ikerketa ugari egingo baitituzte. Gainera, Malaspina Bilduma, espedizioan bildutako laginez osatua, ukiezina izango da hogeita hamar urtez, etorkizuneko ikertzaileentzako balio handiko ondare gisa.
Malaspina izeneko nabigazio-espedizioan parte hartuko dute EHUko ikerlariek
2010ko abe. 14a, 12:29
Bihar, asteazkena, Malaspina 2010 zirkumnabigazio-espedizioa Cadizeko portutik abiatuko da, Hesperides itsasontzian. Zientzia eta Berrikuntza Ministerioak Espainiako Armadarekin lankidetzan prestatutako diziplina arteko proiektu horretan 300 zientzialarik baino gehiagok parte hartuko dute, Alessandro Malaspinari omenaldia egiteko asmoz. XVIII. mendearen amaieran Espainiako lehen zirkumnabigazio-espedizio zientifikoa zuzendu zuen Malaspinak. Proiektuaren helburuak ozeanoaren ekosisteman izandako aldaketa orokorrak aztertzea (klima-aldaketa, kutsadura, erradiazio ultramorearen eragina, ur-mailen aldaketa eta ozeanoaren mugimendua tenperaturaren eta gazitasunaren arabera) eta haren biodibertsitatea, batez ere, ozeano sakonarena, arakatzea dira. "Mundu osoko ozeano sakona aztertzeko lehen ikerketa-proiektu handia da", azaldu du Juan Iriberri irakasleak, espedizioan parte hartuko duen EHUko Zientzia eta Teknologia Fakultateko ikerketa-taldearen arduradunak. Argazkian, Juan Iriberri, Zuriñe Baña, Begoña Ayo, Iñigo Azua, Itxaso Artoloza eta Maria Antonia Unanue / © EHU.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun