Bertako bezeroek udalerrian erosketak egiten jarrai dezaten ingelesezko kanpaina abiatu du Getxoko Udalak. Euskara den bertako hizkuntza baztertuta, "Getxo Shop&Fun meeting point” izen arranditsua jarri diete kanpainako bi gune nagusiei, Areetako Getxolandiaren karpa barruan eta Algortako Torrene kalean kokatutakoak. Bertan, erosketak eroso garraiatzeko 200 orga utzi eta umeentzako puxikak banatzen dituzte, guztiak ingelesezko "Getxo Shop&Fun" lelodunak. Horretaz gain, bestelako zerbitzuak ematen dituzte topaleku horiek, tartean erosketak etxera dohainik eramateko zerbitzua, Olentzerori idazteko eskutitzak banatzea eta denden kokapenari buruzko informazioa ematea. Horiek guztiak euskaraz eta espainolez eskaintzen dituzte beharginek. Argazkian, iaz, lelo elebiduneko "Getxo Eros & Goza - Getxo Shop & Fun” kanpaina aurkeztu zuten Imanol Landa alkateak eta Aitor Soloeta zinegotziak / © Getxoko Udala.
"Gabonak berton. Getxon baino hobeto, non?" programaren barruko ekimena da "Getxo Shop&Fun meeting point”-en sorrera. Aipatu bulegoak goizeko 10etatik arratsaldeko 4etara eta 5etatik gaueko 10etara izaten dira zabalik. Kanpainan erabilitako orgak Gabonak bukatutakoan zerbitzuaren erabiltzaileen artean zozketatuko dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun