Ezker abertzalearen legalizazioaren aldeko jende kateak egingo dituzte bihartik aurrera eskualdean
2010ko abe. 16a, 11:21
Duela aste batzuk 300 militantek egindako agerraldian, proiektu politiko berriaren oinarriak aurkeztu zituen Iruñean ezker abertzaleak. Larunbat honetarako, berriz, Euskal Herri osoan mobilizazio eguna deitu dute, "legalizazioaren aldeko ofentsiba politikoa" abian jartzeko asmoz. Besteak beste, Itzubaltzeta / Romon eta Leioan 13:00etan egingo dituzte giza kateak, Kolas eta Tigre plazan, hurrenez hurren. Algortan, baina, bihar egingo dute mobilizazioa, 20:00etan, Telletxe plazatik abiatuta. Jende katearen irudiak Telletxen bertan, Tellagorri plazan eta Portu Zaharrean hartuko dituzte. Izan ere, Euskal Herri osoan egindako ekimenen grabazioak uztartuta bideoa egingo dute. Irudi horiei batu beharko zaizkie Sopelan hartutakoak. Bertan, agenda arazoak direla medio, igandean egingo dute giza katea, 13:00etan Udaletxeko plazatik abiatuta.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun