Inoiz baino lagun gehiago gerturatu dira Getxoko GKEen topaketetara
2010ko abe. 16a, 13:49
“Getxotik Mundura-Mundutik Getxora” topaketa solidarioen 23. edizioak inoiz baino partaidetza handiago eduki du, bost mila bat lagun, udal iturriek adierazi dutenez. Hiru jardunalditan, abenduaren 11tik 13ra, tokiko erakundeak eta auzokideek finantzatutako proiektuak eta Hegoaldeko herrialdeen errealitatea hurbiletik ezagutzeko aukera eman dute hogei gobernuz kanpoko erakundek. Areetako Xake plazan kokatutako karpan egindako jardueren artean, larunbatean izandako kontzertua —Euskal Herriko, Afrikako eta Andaluziako musikak uztartu zituen— eta igandeko GKEen azoka nabarmendu behar dira. “Oso positibotzat jotzen dugu auzokideen partaidetza eta bizi izandako jai giroa. Oso urrun ditugun beste errealitate batzuk ezagutzeko herritarrek erakutsi duten interesa ere eskertu nahi dugu”, azpimarratu du Begoña Ezkurra zinegotziak. Argazkian, "Getxotik Mundura" topaketen artxiboko irudia / © Getxoko Udala.Jarduera nagusiak amaituta, gaur, osteguna, 19:00etatik aurrera, “Stop malaria orain” hitzaldia izango da Algortako kultur etxean, Villamonten, Munduko Medikuak erakundearen eskutik. Bestalde, larunbatean, hilak 18, 20:00etan, malariari buruzko “El juego de la acacia” antzezlana egongo da ikusgai, Areetako Andres Isasi Musika Eskolan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun