Goikoetxea eta Cotanori 515 urteko espetxe zigorra ezarri diete eta Gutierrezi 8 urtekoa
Espainiako Auzitegi Nazionalak 515 urteko espetxe zigorra ezarri die Arkaitz Goikoetxea eta Aitor Cotano preso politiko getxoztarrei, Europa Press albiste agentzia espainolak zabaldu duenez. 2008ko maiatzaren 14an Legutioko Guardia Zibilaren kuartel-etxearen kontrako atentatua egitea leporatzen diete bi gazteei. Horretan, Juan Manuel Piñuel sarjentua hil eta 26 lagun zauritu ziren, guardia zibilen senideak tartean. Iñigo Gutierrez algortarrari, berriz, 8 urteko espetxe zigorra jarri diote, ETAri laguntzea egotzita. Hiru mutilak azaroaren bukaeran epaitu zituzten aipatu auziagatik. Argazkian, auzokideak Cotano eta Goikoetxearen irudiak sostengatzen, aurreko batean.
Uribe Kostako Amnistiaren Aldeko Mugimenduak adierazi duenez, "harrigarriena, nolabait esateagatik, epaiketan bertan poliziaren perituak ekintza hori burutu zen unean Cotano Londresen zegoela onartu arren, eta horrela dokumentatua zegoela esanda ere, ekintzan parte hartzea leporatu diote besterik gabe…". Espainiako Auzitegi Nazionalean egindako epaiketaren lehenengo saioan, azaroaren 23an, gertaeren egunean aipatu gazte algortarra Palermora (Italia) bidean zela adierazi zuten hiru mutilek. Guardia zibilen idazkariak berak baieztatu zuen, atentatua gertatu baino ordu batzuk lehenago Cotanok Santanderretik Londreserako hegazkina hartu zuela, neskalagunarekin batera, bertatik Siziliako hiriburura bidaiatzeko. Hala ere, erakunde militarreko ordezkariaren arabera, "atentatuaren prestaketan parte hartu zuela egiaztatzen duten hainbat DNA froga badaude, komandoak erabilitako ibilgailuan jasotakoak".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun