Getxoko Udaleko Ingurumen Sailak kanpaina informatibo berria abiatu du animaliak eduki eta babesteko ordenantzan egindako aldaketa nagusiak ezagutarazteko asmoz. Etxez etxe banatutako triptikoetan aisi-guneen berri ematen dute; baita txakurren jabeei helarazitako liburuxketan ere. Aisi-guneetan, txakurrak, aske ibili ahal izango dira, uhalik gabe, balizko arriskua dakarten abereak salbu. Edozelan ere, aipatu tokietan, jabeek txakurrak jagon beharko dituzte, kalterik eta arazorik eragin ez dezaten. Halaber, gorotzak ere batu beharko dituzte. Udalak hainbat leku finkatu ditu, urte-sasoiaren araberako ordutegietan erabiltzekoak: Txurrukako Moila, Areetako hondartza, Algortako Portu Zaharreko zabalgunea, Arrigunaga hondartza, Gobela ibai ondoko pasealekua, Makaletako Etorbidea eta Galeako paseoa. Txakurrak aske ibili ahal izango dira urritik apirilera bitartean, 21:00etatik hurrengo eguneko 8:00ak arte. Uda garaian, berriz, maiatzetik irailera arte, 22:30etik hurrengo eguneko 8:00ak arte; Areeta eta Arrigunaga hondartzetan ezik, higiene eta osasun neurriak direla-eta. Argazkian, hainbat txakur hondartzan jolasten / © Sopelako Txakurren Lagunak.
Betebehar eta debeku orokorrez gain, umeek sarri erabiltzen dituzten parke eta lorategietan etxeko animaliek txiza edota kaka egitea zigortu egingo dela aipatzen da araudi berrian. Era berean, animalien gorotzat behar bezala jaso beharko dituzte jabeek, eta horiek ezin izango dituzte utzi errepidetan zein gune publikoetan. Kaleko edo baztertutako animaliarik aurkitzekotan, udal agintariei eman beharko zaie abisua; etxe-animalien udal zerbitzua delako udalerrian aurkitzen diren galdutako, kaleko ala baztertutako animaliak kudeatzeko, kontrolatzeko eta adoptatzeko ahalmena duen erakunde bakarra. Zigorrei dagokienez, arauak ez betetzearen larritasun mailaren araberakoak izango dira, hau da, 30 euro eta 15.000 euro artekoak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun