Konposta egiteko erabil daitezkeen 58.000 kilo hondakin bildu dituzte Barrikan
Urtebete pasa da Barrikako Udalak herriko lorategi eta lur-sailetako hondakin begetalak gaika biltzeko zerbitzua abian jarri zuenetik. Horren harira, abenduaren 14an, zerbitzu horren balorazioa egiteko hitzaldia hartu zuen udaletxeak. "Barrikan auzoz-auzo" izeneko ekimenaren bidez, 107.647 kilo hondakin bildu dituzte guztira. Hala ere, horietatik 3.147 kilo ez ziren organikoak. Konposta egiteko egokia ez zen lehengaia banandu ostean, erabil zitekeen 58.019 kilo material lortu zuten. Barrikako Udalak sistema horren aldeko apustua egin zuen, "udalerriko hondakinen kudeatze jasangarria optimizatzeko", udal iturriek adierazi dutenez. Modu horretako material begetalaren biltze selektiboa egiten duen antzeko zerbitzurik ez dago Bizkaia osoan, azpimarratu dutenez. Argazkian, hilaren 14an egindako hitzaldia / © Barrikako Udala.
Herriko zenbait gunetan hondakinak biltzeko edukiontzi berriak jarri zituzten, Inaus-puntu izenekoak. Edukiontzi horietan zuhaitz eta lorategien inausketatik eratorritako materiala biltzen dute. Hondakinak kamioi batek eramaten ditu astelehenero. Material begetala, bildu eta banandu ostean, konposta lortzeko lantzen da. Lortutako azken gaia euren lur eta lorategietan erabil dezakete Barrikako auzotarrek, horrela eskatuz gero. Hasiera batean, biltze selektiboa egiteko zazpi gune estrategiko jarri zituzten. Alabaina, sistemak izandako erantzun ona ikusita, Inaus-puntuak zabaldu egin zituzten udalerriko beste auzo batzuetara. Gaur egun hamabi gune daude honako esparruetan: Musurieta, Arriaga, Mendieta, Goierri, Kurtze, Zabaletxe, Amezaga (2 gune), Garramune, Jonakone eta San Telmo (2 gune).
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun