Imanol Landa Getxoko alkateak abenduaren 17ko inaugurazio ekitaldian bertan aipatu zuenez, "ekimen berri honek helburu hirukoitza du: kiroldegiko erabiltzaileei kalitatezko zerbitzua eskaintzea; lana topatzeko zailtasunak dituzten pertsonentzako kalitatezko enplegua sortzea; eta Getxon estrategikoak diren sektore hauetan profesionalak trebatzea”. Interes sozial handia duen proiektua omen da, "irabazi asmorik gabekoa", gaineratu zuenez. Hain zuzen ere, sektore horietan eskarmentu handia daukaten eta pertsonak laneratzen diharduten bi enpresek gestionatzen dute. Datozen sei urteetan 26 lagun kontratatuko dituzte bertan lan egiteko, udal iturrien arabera.
Fadura Ostalaritza
Tabernan gosari bereziak, askotariko pintxoak, ogitartekoak, entsaladak eta modu arin eta osasungarrian jan nahi duten pertsonentzat ere menuko plater solteak eskaintzen dituzte. Jatetxeak, bestalde, 80 lagunentzako lekua du eta, bertan, astelehenetik ostiralera, eguneko menuak zerbitzatuko dituzte, osasungarriak eta kirolarientzat diren jatekoak ere aukeran emango dituztela. Asteburuetan, aldez aurretik eskatuz gero, hitzartutako menuak dastatu eta otorduak ospatu ahal izango dira. Udaldiko hilabeteetan, zerbitzu horrek Fadura barruko taberna ere gestionatuko du, baina horretara kiroldegiko igerilekua erabiltzen duten pertsonak sartu ahal izango dira soilik. Halaber, Fadura Ostalaritzak prestakuntza-ikastaroak egingo ditu, udalerriko langabetuentzat eta enpresa sektoreko profesionalentzat.
Txikigunea
Beste zerbitzu batzuen artean, 3 eta 12 urte bitarteko umeak zaintzen dituzte orduka. Arratsaldetan, berriz, kultur eta aisialdi ekintzak antolatzeko asmoa dute; baita zerbitzu bereziak ere, oporraldietan, neska-mutikoak goiz zein arratsaldetan zaintzeko. Horrekin batera, urtebetetzeak egiteko aukera ere badago.
Dagoeneko zabalik daude Getxoko Udalak Algortako Fadura kiroldegian jarritako ostalaritza eta umeen aisialdirako zerbitzu berriak. Proiektuaren aurrekontua 1.820.000 euro ingurukoa izan da eta, horietatik, 700.000 euro Bizkaiko Foru Aldundiak jarri ditu. Horrenbestez, Fadura Ostalaritza eta Txikigunea deituko guneek 1.600 metro koadroko eremua hartzen dute, kirol azpiegituraren eskaintza indartzeko asmoz. Lehenengoak kiroldegiaren ordutegi berbera izango du, hau da: astelehenetik igandera, goizeko zortzietatik 21:30ak arte. Taberna eta jatetxe zerbitzuak izango dira bertan. Txikiguneari dagokionez, astelehenetik ostiralera egongo da zabalik, arratsaldetan, 16:00etatik 21:00etara; eta asteburuetan, goizez zein arratsaldez, 11:30etik 14:00etara eta 16:00etatik 21:00etara. Argazkian, inaugurazio ekitaldiko irudietako bat / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun