Imanol Landa alkateak udalerrian bultzatzen ari diren "modernizatze prozesuaren barruan" kokatu ditu Bolue 1 eta 2 futbol zelaietako berrikuntza lanak. "Kirol instalazioak ere sartzen dira horretan", gaineratu duenez. Horien artean, Algortako Fadura udal kiroldegia berriztatzeko 8 milioi euro gastatuko dituzte. “Azken finean, kirol ekipamenduekin ere XXI. mendera jauzi egitea nahi dugu, baita kirola egiteko herritarrek behar dutenari erantzuna ematea ere. Bide horretan, Udalaz gaindiko erakundeen laguntza bilatu eta aurkituko dugu: Aldundiarena, Eusko Jaurlaritzarena, dagokion Ministerioarena zein Europako Batasunarena”, zehaztu du alkateak.
Gainontzeko lanak
Markesina berriak ipintzearekin batera, belar artifiziala kendu eta berria jarri dute. Halaber, belarraren azpian dagoen sendogarri elastikoa, zelaia bigunagoa egin eta lesio arriskua gutxitzen duen mantu pneumatikoa, konpontzeko ere baliatu dituzte lanak. Horrekin batera, zelaiak inguratzen zituzten hormigoizko hesiak beira-zuntzezkoengatik ordezkatu dituzte. Azkenik, zelaietan argi gehiago jarri eta drainatze eta ureztatze sistemak hobetu dituzte.
Euritik babes daitezke jada Algortako Bolue 1 eta 2 futbol zelaietara doazen ikusleak
Dagoeneko jarrita daude Algortako Bolue 1 eta 2 futbol zelaietako markesina berriak, partidak ikustera joan ohi diren lagunak euritik babesteko asmoz. Asteburuan bi mila ikusle inguru izaten dira bertan, udal iturrien arabera. Aurretik ere antzeko estalki batzuk jarri zituzten, baina fabrikazio akatsak sumatu ostean, horiek kendu eta altzairuz eta kristalez egindako berriak jartzeko agindu zuen Getxo Kirolak erakundeak. Aipatu lanak Udalak egindako erabateko zaharberritzearen zati bat dira. Duela hamahiru urte futbol zelai horiek Bizkaiko erreferente bilakatu ziren, bertako belar naturala kendu eta artifiziala jarri zutelako. Imanol Landa alkate getxoztarra bertan izan da gaur, Mikel Cabieces Espainiako Gobernuak Araba, Bizkaia eta Gipuzkoan duen ordezkariarekin batera. Izan ere, Toki Inbertsiorako Estatuko Egitasmoen kontura egin dira berrikuntza lanak. Bi futbol zelaien egokitzeak 660.000 euroko kostua izan du; markesinak ipintzeak, berriz, 108.000 euro. Argazkia: © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun