LAB: "Abenduaren 31n eta urtarrilaren 8an huts egin ezineko bi hitzordu garrantzitsu ditugu"
Etzi urteko azken ostirala izaki, Etxeratek egindako deialdiari erantzunez Euskal Herri osoan euskal presoen alde egingo diren mobilizazioetan parte hartzera dei egiten die LABek euskal langileei eta jendarteari, oro har. Halaber, urtarrilaren 8an Bilbon "Egin dezagun urratsa, eskubide guztiekin euskal presoak Euskal Herrira" lelopean egingo den nazio manifestazioan parte hartzeko deia ere egiten dugu. 2010ean ere Espainiar Gobernuak indarrean izan duen espetxe politika salatu nahi dugu LABetik. Larria da euskal preso politikoei dagozkie eskubide guztiak ez betetzea, eta larritasun hori areagotu egiten da gaixo diren presoen eta kondena beteta izan arren kartzelan bahituta jarraitzen duten presoen kasuan. Kalean beharko luketen eta oraindik kartzelan diren preso guztien berehalako askatasuna eskatzen du LABek. Gaur gaurkoz 700 euskal herritar baino gehiago dago preso, gehienak Euskal Herritik urrun, ehunka kilometrora. Argazkian, LAB presoen alde Areetan, azaroaren 5ean.
Presoek euskal gatazkaren konponbidean parte izan behar dutela aldarrikatzeaz bat, dei egiten diogu Espainiar Gobernuari bizi dugun garaiotan erantzukizunez jokatzen hasteko, herritar ororen, eta kasuan, kartzeletan diren euskal presoen oinarrizko eskubideen errespetu eta bermetik abiatuz. Euskal eragileoi, euskal herritarroi dagokigu aldarrikapen horrekin bat egin eta bultzatzea. Abenduaren 31n eta urtarrilaren 8an huts egin ezineko bi hitzordu garrantzitsu ditugu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun