Aipatu diru laguntzak ematerakoan "kalitate teknikoa" eta proiektuak azken helburuarekin koherenteak izatea kontuan hartzen dute. Izan ere, "diru-laguntza hauek aukeratutako herrialde txiro hauetako emakume eta gizonei on gehien egiten dioten proiektuetara bideratzea" da tokiko erakundearen xedea. Udalak adierazi duenez, "aukeratutako proiektu horiek genero berdintasuna, parte-hartzea eta antolakuntza, errespetua eta giza eskubideen promozioa zein ingurumen jasangarritasuna bermatzen dituzte". Emakumeen jabekuntza bermatzen dituzten egitasmoak baloratu dituzte batez ere.
Txile eta Haiti
Horretaz gain, urtean zehar beste bi herrialdeei ere laguntza eman diete, partida horretatik. Leioako Udalak Txile eta Haitira bidali du dirua, horietan bizi izandako egoera latzengatik, berehalako laguntza behar zutela. Haitira 6.000 euroko laguntza zuzendu zuen tokiko erakundeak; Txilera, berriz, 2.360 euro. Azken horren aldeko kontzertuan ateratako dirua gehituta, 6.000 euro jaso zituzten txiletarrek. Diru-laguntza horiek guztiak kontuan hartuta, 170.000 euro banatu dituzte; erreserban dagoen 34.838,74 euroekin batera, Udaleko aurrekontuaren %0,7a. Azken kopuru hori ustekabeko hondamendietara, sentsibilizazio kanpainetara eta Saharako karabanara bideratuko dute.
Garapenerako lankidetza proiektuetarako diru-laguntzak banatu ditu jada Leioako Udalak, aurten gainera ordenantza berriaren arabera. Zazpi egitasmok jasoko dute aurten subentzioa. Besteak beste, 81.190,33 euro udalerriak harreman berezia mantentzen duen bi herrialdetara bideratuko dituzte, Saharara eta Dominikar Errepublikara, hain zuzen. Alde batetik, Edex elkarteak 40.599,59 euro gehiago izango ditu Latinoamerikako aipatu herriko Santiago eskualdean lan egiteko. Bestalde, Fath elkarte leioaztarrak bi ekintzarako dirua jasoko du: batetik, 5.400 euro, saharar umeak Leioara ekartzeko “Oporrak bajean” izeneko egitasmoaren barruan; eta bestetik, 40.630,74 euro, basamortuko errefuxiatu-guneetan laguntza humanitarioko hainbat proiektu garatu ahal izateko. Argazkian, urtero hainbat saharar umek igarotzen dituzte udako oporrak Leioan / © Leioa.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun