Eusko Jaurlaritzak urtarrilean abiaraziko ditu berriro Leioa eta Erandioko campuserako tranbiaren kotxetegiak egiteko lanak. Aipatu obrak uztailean geldiarazi zituzten Lamiakoko orubean kutsatutako lurrak aurkitu zituztelako. Hilabete horretan bertan jarri zuten kotxetegietako "lehen harria". Eusko Trenbide Sareak (ETS) martxoan agindu zituen obrak, 4,17 milioi eurotan; eta lursailaren garbiketa lanak ekainean hasi ziren. Lehenengo probetan ez zen kutsadura arrastorik aurkitu eta lanekin jarraitu zuten. Hala ere, bigarren analisi batean, beruna, merkurioa, artsenikoa eta polikloruro bezalako metal astunak eta petrolio zein olio hondakinak aurkitu zituzten orube azpiko toki askotan. Ondorioz, lurraren kalitatearen ikerkuntza, garbiketa plana eta lurraren hondeatze gestiorako txostenak osatu behar izan zituzten, Ihoberi bidaltzeko. Orain bi ostegun, hilaren 16an, Eusko Jaurlaritzaren Ingurumen Sailak prozesuaren hasiera onartu zuen. Garbiketa lanak urtarrilean abiaraziko dituzte. Lau astez luzatuko dira. Ondoren, kotxetegiak eraikitzen jarraituko dute. Eneko Arruebarrena Leioako alkateak azaroan plazaratu zuen lanen atzerapenen inguruko irakurketa instituzionala. Orain egun batzuk, beste eragile politiko batek, tokiko ezker abertzaleak, Leioan tranbia beharrezkoa ote den. Argazkiak, horrelakoak izango omen dira tranbiaren kotxetegiak / © Leioa.net.
Kutsatutako orubearen azalera 12.366 metro koadrokoa da eta, Ingurumen Sailak onartutako hondeatze planaren arabera, metro bat behera egingo dute lursail osoa hustuz. Ondoren, hondeatze selektiboak egingo dituzte hurrengo bi eta hiru metroetan, zenbait tokitan. Guztira, 17.808 metro kubiko lur kenduko dituzte. Horietatik ateratako kutsatutako 2.136 metro kubiko hondakin arriskutsuen zabortegi kontrolatu batera eramango dituzte. Beste 2.849 metro kubiko hondakindegi batera bidaliko dituzte eta hidrokarburo maila batzuk dituzten 12.821 metro kubiko lur Bilboko Portura eramango dituzte. Bertan, tratamendu espezifiko bat jaso ostean, betetze material bezala erabiliko dituzte.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun