Imanol Landa alkatearen dekretuz, urtarrilaren 6ra arte, ikuskizun publikoak eta aisialdiko jarduerak ixteko ordutegia bi orduz luzatuko dute Getxo udalerrian. Beraz, aipatu egunetan bi ordu beranduago zerratu ahal izango dute tabernek. Eusko Jaurlaritzaren Ikuskizun publikoen eta jolas-jarduerei buruzko Legearen arabera, astelehenetik ostegunera zein igandeetan; 00:30ean itxi behar izaten dute tabernek eta jatetxeek; 02:00etan disko-tabernek, pubek, karaokeek eta antzekoek; eta 04:00etan diskotekek eta dantzalekuak. Beti ere jaiegun bezpera ez bada. Ostiral, larunbat eta jaiegun bezperetan, berriz, 01:30, 03:00 eta 05:00ak arte izan ohi dute, hurrenez hurren. Gauzak horrela, Gabon zahar gauean, aipatu azken ordu horiei bi gehiago gehitu beharko dizkiete Getxo udalerrian parranda egin nahi duten gautxoriek. Ostalariei ordu erdi ematen diete establezimendua husteko. Argazkian, parrandazalea gauaz gozatzen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun