Orain dela lau egun Andra Mari kale plentziarreko 1 zenbakiko etxean sartu ziren Plentzia ta Gorlizko Gazte Asanbladako (PGGA) kideak, bertan gaztetxea egiteko asmoz. Neska-mutilek UKBERRI.NET agerkari digitalari adierazi diotenez, izena ere jarri diote jada eskualdeko gune autogestionatu berriari: Ermitatze gaztetxea. Izan ere, baseliza atzealdean dago, Piruli plazatxotik eta Jai Alai frontoitik gertu. Lehenengo egunean udaltzainen bisita izan zuten. Hiru gazte identifikatu zituzten arren, asanbladakoek ez dute uste arazo handiegirik izango dutenik. Egun hauetan garbitze eta atontze lanetan dabiltza. Albait lasterren hasi nahi dute tailerrak eta hitzaldiak egiten. Bi aste barru etxeko hiru solairuetatik behekoa prest egotea espero dute PGGAkoek. Hori dela eta, eskualdeko neska-mutilei Ermitatze gaztetxera hurbiltzeko gonbitea luzatu diete, auzolanetan laguntzeko asmoz. Asteburu honetan, goizeko hamarretatik aurrera, gutxi gora behera, izango dira bertan. Argazkia: © Plentziako ta Gorlizko Gazte Asanblada.
Abenduaren 18an beste etxe batean sartu ziren Plentzia ta Gorlizko Gazte Asanbladako lagunak, baina lau ordu baino ez zuten iraun bertan. Neska-mutilek azaldu dutenez, sartu eta gutxira agertu ziren Plentziako Artekaleko eraikinean udaltzainak, jabearekin harremanetan jarriko zirela esanez. Handik bi ordutara agertu zen aipatu laguna. Otsailean etxea bota eta sei apartamentu eraikitzen hasiko zela esan zien gazteei jabeak. Eraikinaren egoera ere kaskarra zenez alde egitea erabaki zuten neska-mutilek.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun