Getxoko Udaltzaingoak D.C. inizialak dituen Bilboko 39 urteko gizonezkoa atxilotu zuen atzo, asteartea, Algortako supermerkatu batean ebastea eta agiri faltsuak eramatea egotzita. Gertaera atzo izan zen, 16:30ak aldera. Sarrikobaso kaleko supermerkatuaren inguruan, mugikortasun murritza duten pertsonentzat gordeta dagoen tokian auto bat aparkatuta zegoela ikusi zuten zaintza lanak egiten omen zebiltzan udaltzainek. Udalak zabaldutako bertsioaren arabera, poliziak hurbil zeudela konturatzean ibilgailua "toki egokiago batera" eraman zuen gidariak. Apur bat geroago, kale berean auto hori berriro txarto aparkatuta zegoela ikusi zuten udaltzainek. Gidaria karro batean zeramatzan produktuak ibilgailuaren maletategian sartzen ari zen, beste bi gizonek lagunduta. Poliziak ikustean, aipatutako bi gizonezkoek alde egin zuten, agenteen susmoak piztuz. Gertatzen ari zena ikertzera hurbildu zirenean, udaltzainek ondoko supermerkatuan ebatsitako produktuak zirela egiaztatu zuen, udal iturriek adierazi dutenez. Argazkian, Getxoko udaltzain bat motor gainean.
Gehien bat kosmetikoak ziren. 586 euro guztira. Horretaz gain, identifikatzeko eskatu ziotenean, agiri faltsua ateratzea ere leporatzen diote. Bestalde, Holandan matrikulatutako ibilgailua omen da erabiltzen ari zena. Horren agiriak aurkeztu ez zituenez, udal gordetegian utzi dute autoa, epailearen agindutara, horren egoera zein den argitu arte. Udal iturriek zabaldutakoaren arabera, indarkeriaz egindako lapurretengatik polizia-aurrekariak ditu atxilotuak eta epailearen esku utzi dute. Azkenik, ustez lapurretan parte hartu zuten beste bi gizonak nortzuk diren ikertzen ari da Getxoko Udaltzaingoa.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun