A-2171 autobus lineak Txorierri eta Areetako anbulatorioaren arteko joan-etorria egiten du. Zerbitzu publiko horren helburu nagusiena da Leioako erdigunetik urrun dauden zonaldeetako bi —Txorierri eta Ikea— komunikatzea. Garraioa duela 30 urte indarrean jarri zuten udal erabaki baten ondorioz, baina geroago Bizkaiko Foru Aldundiak hartu zuen horren ardura, tokiko iturriek aipatu dutenez. Betidanik astelehenetik ostiralera ibili da autobusa, baina orain dela hamar urte inguru, Leioako Udalak lankidetza hitzarmena sinatu zuen enpresa esleipendunarekin zerbitzua luzatzeko. Modu honetan, etenik gabeko ordutegia ezarri zuten goizeko zortzietatik gaueko hamarrak arte aste barruan; baita larunbat goizera zabaldu ere. Orain, berriz, zerbitzua luzatuko dute larunbat arratsaldera eta igande goizera.
Sei hilabeteko proba-aldia
Beraz, ordutegi arruntari ondoko orduak gehitu behar zaizkio: larunbatetan 15:00etatik 20:00etara eta igandeetan 9:00etatik 14:00etara ere ibiliko da autobusa. Udal iturriek zehaztu dutenez, ordutegi hori ez da finkoa oraindik, eskariaren arabera moldatuko baitute hurrengo egunetan. Zerbitzuaren indartzeak urtean 63.000 euroko gastua eragingo dio Leioako Udalari. Joan den asteburuan jarri zuten martxan ordutegi berria, eta Udalaren asmoa behin betikoa egitea bada ere, sei hilabeteko proba-aldia igaro beharko du azken erabakia hartzeko.
Igogailua jarri ordez Txorierri eta Lamiako arteko autobus zerbitzua indartu behar izan dute
Txorierri eta Ikea auzoetako autobus zerbitzu publikoa indartu egin du Leioako Udalak. Hemendik aurrera, larunbat arratsaldetan eta igande goizetan ere izango dute erabilgarri bizilagunek. A-2171 autobus linea Txorierriko herritarrek eskatuta sortu zuten, aipatu auzoa Leioako erdialdearekin, Lamiakorekin edota Getxo udalerriarekin lotzeko "ezinbestekoa" delako. Bestalde, Txorierri eta Lamiako arteko eskailerak saihesteko, Udalak igogailuaren proiektua ere badauka mahai gainean; baina gaur egun Eusko Jaurlaritzaren erabakiaren zain dago, "berari baitagokio orain hitzartutakoa betetzea", tokiko iturrien arabera. Leioako Udalak eta Eusko Jaurlaritzak 2009an sinatutako hitzarmenaren arabera, Gasteizko Gobernuak lurzoruaren kudeaketaz, desjabetzeez eta kalte ordainez zein urbanizazio lanez arduratu behar zen, erakunde leioaztarrak igogailua ordain eta jar zezan. "Jaurlaritzak oraindik pausuak eman ez dituenez eta denbora aurrera doanez, Udalak autobus zerbitzua indartu eta ordaindu behar izan du, herritarrek behin-behineko aukera bat izateko", adierazi dutenez. Urtean 63.000 euroko gastua eragingo omen dio horrek Udalari. Argazkian, Txorierri (goian) eta Lamiako (behean) lotzen dituzten eskailerak / © Leioa.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun