Mankomunitateko emakumeentzako autodefentsa ikastaroa egingo dute hilaren bukaeran Urdulizen
2011ko urt. 13a, 13:31
Urtarrilaren 28 eta 29rako autodefentsa ikastaroa antolatu dute Uribe Kostako Mankomunitateko Berdintasun Zerbitzuak, Urdulizko Udalak eta Inola emakumeen elkartea tokiko emakumeen elkarteak. Horretarako, hainbat lan arlo planteatuko dituzte, eta horien bitartez aztertu eta sakonduko dute zergatik sortzen den indarkeria sexista. "Era berean, eraso jokabideak normaldu eta ondoren natural bihurtzeko prozesuan, hizkuntza, publizitatea, hedabideak, gorputz adierazmena eta musika gurekiko —emakumeekiko— zein garrantzitsuak diren ikasiko dugu", gaineratu dute antolatzaileek. Ikastaroa doakoa da, eta 14 eta 90 urte bitarteko emakume guztiek parte har dezakete. "Modu erraz batean eta teknika ikasterrazak erabiliz irakatsiko digute nola defendatu behar dugun geure burua eguneroko bizitzan modu batean edo bestean aurki ditzakegun sexu erasoen aurrean, geu baikara eraso horien biktimak", azaldu dutenez. Hilaren 28an, ostiralean, 16:00etatik 20:00etara izango dira eskolak. Eta hurrengo egunean, larunbatean, 10:00etatik 14:00etara eta 15:30etik 19:30era. Urdulizko Kultur Etxean (Aita Gotzon, 16) egingo dute ikastaroa. Izena eman nahi duten emakume guztiek Inola elkartearen (946 763 496 / inola[abildua]inola.es) edo Mankomunitateko Berdintasun Zerbitzuaren (946 579 282 / berdintasuna[abildua]uribekosta.org) bitartez egin beharko dute. Eskoletara arropa erosoa eramatea eskatu dute. Argazkia: cc-by-nc-sa praktikatu."Ikastaro honen bitartez, Urduliz eta Uribe Kostako beste herrietako emakumeok erasoak identifikatzen ikasiko dugu, eta aztertuko dugu indarkeria nondik datorren eta nola eraikitzen den; baita maila indibidualean zein kolektiboan horren ondorioak zeintzuk diren ere. Bestalde, eguneroko bizitzan aurki ditzakegun eraso fisiko, hitzezko edo psikologikoen egoerei erantzun eta ebazteko mekanismoak bilatuko ditugu denon artean", adierazi dute antolatzaileek. Bide batez, emakumezkoen eskubide eta gaitasunen gaineko kontzientzia hartzea ahalbidetzen duen espazioa eraiki nahi dute, eta konfiantza eta segurtasuna bultzatu nahi dituzte, indarkeriaren inguruko mitoak apurtuz eta emakumeen ahultasun fisikoaren estereotipo zaharrak desmitifikatuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun