"Beranduegi" web-telebista saioa estreinatuko du "Argia"-k asteartean

Asteartetik aurrera, Interneterako propio egindako "Beranduegi" telebista saioari ekingo dio "Argia"-k. Astekariak zabaldu duenez, euskarazko saio berriak "umore ukitua izango du, eta hamar minuturen bueltan ibiliko da; azken batean, WebTB formatuko saioa izango da". Astero, egunerokotasunari errepasoa, analisiak, elkarrizketa eta erreportajeak, Argia.com-eko blogarien idatziak, tartean Unai Brea kazetari berangoztarrarenak... eskainiko ditu: "atal ugari izango ditu saio berriak, baita internautei zuzendutako lehiaketa ere. Irabazleek sari ederrak jasoko dituzte: bi lagunentzako asteburu-pasak nekazal etxe eta hoteletan, bazkari edo afariak...", Lasarte-Oriatik azpimarratu dutenez. Horrela, egun Ibaizabal Telebista, Euskalherrian.info-ko albisteak2.0, eitb.com, Hamaika Telebista eta Tokitan.tv-k, besteak beste, ematen duten euskarazko eskaintza osatuko dute. Bitartean, Euskaltube.com berrirekitzeko kanpainak aurrera jarraitzen du. Argazkian, "– Gelditu makinak! – Beranduegi! Kar, kar, kar" hitzen pean saioa irekitzen duen irudietako bat / © Argia.com.