Kebab brotxeta mistoa da (otarrainxka, oilaskoa eta alga dira osagaiak), euskal ketchup goxo batez maneatuta (baratzeko tomateekin, piper txorizeroarekin, antxoa gazituekin, eztiarekin eta sagardo ozpinarekin eginikoa). Pintxoa bertoko tabernatan salduko da: Txomin, Arrantzale, Portu Zaharra, Itsas Bide eta Usategi ostatuetan, hain zuzen. “Diziplina anitzeko ekimen berria eta berriztatzailea da, arlo turistikoa eta artistiko-kulturala, argazkigintza, arkitektura eta gastronomia uztartzen dituena”, azpimarratu du Imanol Landa alkate getxoztarrak. Bere hitzetan, “udalerrira bisitariak erakartzeko eta bertoko ostalaritza establezimendutan aberastasuna sortzeko baliagarria izango da hori”.
“Getxok”, esan du Landak, “adierazpen artistiko berriei ateak zabaltzen dizkio. Dinamismoaren eta joera ekintzailearen irudiarekin batera, sormena, eta artelan honen izaera berritzailea eta ausarta sustatu nahi ditugu, Getxo desberdin, gazte eta aurrerakoia balorean jartze aldera”. Tokiko agintariak ziurtatu duenez, “ekimen honek elkarteekin eta gizarte zibiletik sortzen diren jarduerekin egiten duen elkarlanari buruz Udalak duen ustea indartzen du, herritarrak kultura pasibotik atereaz eta adierazpen artistikoan egile aktiboa bihurtuz”.
Ikusi bideoak (© Urtzi Altube - Ilanda.eu):
Marcos Lopez argentinarraren “El Sireno del Rio de la Plata” tamaina handiko argazkia eskuratu du aldi baterako Getxoko Udalak. “Getxoko Sirenoa” izena jarri eta Algortako Portu Zaharreko murrutzar handian lekutu dute "ingurunearekin adeitsua eta harmonikoa den modu batean", Getxophoto-Nazioarteko Argazkigintza Jaialdiaren antolatzaile Begihaundi elkartearen laguntzaz. Ekimenean auzokideek, ostalariek eta gizarte-eragileek ere parte hartu dute, tokiko arduradunek adierazi dutenez. “Getxoko Sirenoa” artelan dinamikoa da, itsasoarekin elkarreraginez, irakurketa ezberdinak eskainiko baititu, itsasaldiaren arabera: itsasgorarekin gizon baten soina biluzik ikusi ahal izango da eta, marea jaisten den heinean, itsas izakia dela ikusi ahal izango da. Xabier Goikoetxea arkitektoak euskarri berezia prestatu du, irudiarentzat eta bere kokapen bereziarentzat. Halaber, horren inguruan urtean zehar egingo diren beste jardueren artean, Fernando Canalesek eta Paul Ibarrak, Etxanobe jatetxeko sukaldariek, “Sireno Pintxoa” sortu dute, pertsonai mitologikoan –erdi gizon erdi arrain– inspiraturik. Argazkian, Udaleko eta Begihaundi elkarteko arduradunak sukaldariekin eta artistarekin batera, “Sireno Pintxoa” aurkezten / © Getxoko Udala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun