Bestalde, azken egunotako gertaerak ere ez zituzten ahaztu nahi izan atzoko ekitaldian. Hizlariek gogoratu zutenez, ETAri egiten zitzaion eskaera erantzuna izan du berriki, erakunde armatuak sueten "egonkor, iraunkor eta egiaztagarria" aldarrikatu baitu. Gauzak horrela, Sopela eragileek ere uste dute, garaia dela, "Espainiako Estatuak urratsak ematen has dadin", Gernikako Akordioan eskatzen zaiona betetzeko. Ildo horretan, "gure herrian sektore handi eta esanguratsua" den ezker abertzalearen adierazpen politikoa legeztatzeko eskatu zioten; baita "hainbeste sufrimendu eragin duen espetxe politika ankerra deuseztatzeko" ere. Helburu horiek lortzeko jarraituko dute lanean.
Ikusi Sopela.net agerkari digitalak egindako bideoa:
Gernikako Akordioa aurkeztu zuten atzo iluntzean Sopelako Kurtzio Kultur Etxean, bertan hamarnaka herritar zirela. Ekitaldiaren bidez, irailaren 25ean Euskal Herriko 30 eragilek izenpetutako idatziak udalerrian jaso duen "babes politiko eta sozial zabala" erakutsi nahi izan zuten; baita tokian tokiko sinatzaileek hartutako "konpromiso irmoa" ere. Kurtzion bertan agiria sinatuz irudikatu zuten. Besteak beste, hurrengo udal batzarrera hurbiltzeko deia luzatu zieten (mp3) sopeloztar guztiei. Izan ere, aipatu egunean, urtarrilaren 27an, Gernikako Akordioari buruzko mozioa aurkeztuko dute, "Sopelan gehiengoak babesten duela adierazteko asmoz". Udalbatzan ordezkaritza duten alderdietatik, EAk, ezker abertzaleak, Alternatibak eta Berdeek bat egin dute adierazpenarekin. Bestalde, tokiko Aralar, LAB, Gazte Independentistak, Etxerat, Amnistiaren Aldeko Mugimendua eta Gazte Abertzaleak erakundeez gain, Peñatxuri surf taldeak, Tai ji taldeak, Gazte Asanblada Sopeloztarrak, Plaza Beltza herri kulturguneak, Meñakoz kultur elkarteak, Nuyum Sahararen aldeko elkarteak eta Airetik parapente taldeak eman dute atxikimendua. Argazkian, Gernikako Akordioa izenpetu duten Sopelako eragileen ordezkariak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun