Batxilergoko 200 ikaslek esperimentuak egingo dituzte EHUko laborategietan
2011ko urt. 17a, 13:12
EHUko Zientzia eta Teknologia Fakultateak estreinakoz antolatu du "Fisikaz blai" izeneko programa. Egitasmoan 35 institutu eta ikastetxetako 200 ikaslek parte hartuko dute, bi astez, joan den ostiralean hasita. Hamar laguneko taldetan, ikasleek, hiru ordu eta erdiko saioetan, zenbait esperimentu egingo dute, batzuk ikusgarriak, beste batzuk oso praktikoak, haien Batxilergoko irakasleak eta Fakultateko beste irakasle batek ikuskatuta. "Fisikaz blai" programa urtarrilaren 25ra arte abian izango da. Horren helburua da Batxilergoko ikasleek zientzian oro har eta bereziki fisika izan dezaketen interesa indartzea, EHUko iturriek zehaztu dutenez. Bestalde, laborategiko lanetan ikasleek duten prestakuntza ere hobetu nahi dute. Horretarako, Zientzia eta Teknologia Fakultateak irakaskuntza-laborategiak, Fisikakoak eta Ingeniaritza Elektronikako Ikerkuntzakoak ere, eskainiko dizkie ikasleei, Fisika hobeto uler dezaten eta belaunaldi berriek zientzia honen eta gaur egungo bizimoduan daukan eragin handiaren berri izan dezaten. Argazkia: © EHU.Bestetik, "Fisikaz blai" saioak, "Unibertsitateko eta Batxilergoko irakasleen arteko komunikaziorako bide berria irekitzen du, batzuen eta besteen lana eta beharrak hobeto ezagutzea eta ikasleen hezkuntza hobetzea ahalbidetuko duena", azpimarratu dutenez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun