Ekainera arteko egitaraua prest dauka Kultur Leioak
2011ko urt. 18a, 11:19
Kultur Leioa udal erakundeak hurrengo sei hilabeteetan izango diren kultur ekintzen egitaraua (pdf) kaleratu du jada: "egitarau anitza eta kalitate handikoa, estreinaldi potoloekin eta nazioarte mailan arrakasta itzela lortu duten artista eta lanekin", tokiko iturrien hitzetan. Adierazi dutenez, "luxuzko egitaraua dela esan genezake, leioaztarrentzat zein inguruko herrialdeetako biztanleentzat zuzendutakoa. Kalitate hori dela eta gero eta gehiago dira Kultur Leioako lagun egin izan direnak, egun 300 inguru". Udal kultur erakundeak prestatutako ekintzak laburbilduz, 32 ikuskizun eta 40 saio horietatik ondokoak izango dira: zortzi musika emanaldi, formatu txikiko hiru kontzertu, nagusientzako lau antzerki lan, hiru familia antzerki eta beste bat umeentzat, dantza, zirkua, eskola antzerkia ingelesez eta euskaraz, zinea, lehiaketak, Aterpe Leioa Gaztegunearen ekintzak eta auzoetako kulturguneetako ekintzak. "Honetaz gain, ezin dezakegu ahaztu kultur mailan Leioan izaten den hitzordu nagusienetariko bat datorrela laster, Umore Azokaren hamabigarren edizioa", nabarmendu dutenez. Aurten, maiatzaren 12tik 15era izango da Leioako Kale Artisten Azoka. Argazkian, iaz plazaratutako ikuskizunetako bat / © Umore Azoka."Egitarau ikaragarri honek erakusten digu aurtengo udal aurrekontuek ez dutela kultur partida murriztu, kontrakoa baizik, kultur ekintzetarako bideratutako dirua zer edo zer handitu da aurten. Leioako herritarren artean Kultur Leioak duen harrera ona eta erantzuna izan dira funtsezkoak erabaki hau hartzerakoan", azaldu dute tokiko arduradunek. Horrenbestez, Kultur Sailak 2011 osorako duen aurrekontua 239.462,02 eurokoa da. Kopuru horretatik 82.062,62 euro "ambigu" eta auditoriora bideratu dira, 31.800 euro erakusketentzat, 23.457,62 euro gazteen ekintzetarako eta pop-rock lehiaketarako, 30.058 euro gainontzeko lehiaketentzat (kartelak, aratusteak, literatura eta Santa Ageda), auzoetako kulturguneetan 38.418 euro banatuko dira; eta azkenik, liburutegiak 33.665,78 euro jasoko ditu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun