Leioako Udalaren Gizartekintza Sailak ekitaldi berezia prestatu du biharko, mendekotasuna duten pertsonen zaintzaileak omentzeko asmoz. Hitzordua arratsaldeko seietan jarri dute, Kultur Leioan. Ekitaldian, tokiko erakundeak antolatutako programan parte hartu duten jagoleak izango dira. Bertan, diploma bat jasoko dute Eneko Arruebarrena alkatea eta Isabel Garcia zinegotziaren eskutik, egindako lana eskertzeko. Guztira 200 lagun baino gehiago biltzea espero dute: emakumeen elkarteak; kultur taldeak; gizarte zerbitzuen teknikariak; kultura ordezkariak; eta kirolak, enplegua eta gizartekintzako agenteak, besteak beste. "Dena dela, esan behar da protagonista nagusiak 46 lagun izango direla (42 emakume eta 4 gizonezko), eurak baitira udal programetan parte hartu izan dutenak", nabarmendu dute udal arduradunek. "Ekitaldi honekin euren esfortzua eta lana goraipatu nahi da eta, bide batez, jakitera ematea gaur egun gizartea sentzibilizatzeko eta euren lana ikusgai egiteko", gaineratu dutenez. Argazkia: © Leioa.net.
Omenaldia egin eta gero, ekitaldiak jai kutsua hartuko du, musika oinarri bezala hartuz, Leioako Musika Eskolako ikasleen eta Errekaldeko Nagusien Abesbatzaren partaidetzarekin, besteak beste. Horretaz gain, pailazo berezi baten saioarekin amaituko da gaua. Bestalde, tokiko iturriek gogoratu dute biharkoa ez dela Leioako Udalak jagoleen lana bultzatzeko egindako ekintza bakarra. "Jakina denez, Udalak urte bi daramatza jagoleei eta mendekotasuna duten pertsonei zuzendutako programak bultzatzen. Programa hauetan Zainduz proiektua dugu, prestakuntza, laguntza psikologikoa eta psikomotrizitatea biltzen dituzten hainbat programekin. Guzti hau doakoa da pertsona hauentzat eta ordutegien malgutasun osoz", azaldu dute arduradunek. Horretaz gain, azken kanpaina ekarri dute gogora, "oraindik Leioako kaleetan zehar ikusi dezakeguna". Horretan, Udalak zaintzaileen lana eskertzen zuen publikoki eta pertsona horien lana erakusten zion jendarteari, bide batez, kontzientziatzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun