"Datorkigun poliziari" buruz arituko dira bihar Larrabasterran

Bihar, osteguna, "Datorkigun polizia" izenburuko hitzaldia eskainiko dute Plaza Beltza kulturgunean. Hitzordua 19:30ean jarri dute, Larrabasterrako Akilino Arriola kaleko egoitzan. Hilabete gutxi batzuk pasa dira, bertan "Alternativas al modelo policial" solasaldia izan zenetik. Gaiarekin jarraituz, "gure gizartean gero eta handiagoa den militarizazioa eta euskal poliziaren bilakaera izango dira mintzagai. Polizi ereduaren inguruko eztabaida gizarteratzea, inoiz baino beharrezkoagoa den momentu honetan, proposamen interesgarria izango dela ziur gaude", Plaza Beltzako kideek adierazi dutenez. Bestalde, literatura tailerra, kontsumo taldea eta josteko zein arropa konpontzeko txokoa martxan dituzte jada. Argazkian, neska bat liburua irakurtzen kulturgunearen inaugurazioan.