Alkate getxoztarraren hitzetan (mp3), "aitortza horrek aipatu gertaera historiko horiek inoiz gehiago jazo ez daitezen balioko du; baita giza eskubideekiko begirunea, demokrazia, askatasuna, elkartasuna eta bakearen eta bizikidetzaren kultura bere oraingo eta etorkizuneko garapen eta aurrerapenerako oinarrizko zutabe izango dituen gizartea osatzen laguntzeko ere". Landak "poztasun bikoitza" agertu du (mp3), “lehenik, gure herrialdeko historiako gertaera beltz eta mingarri horien biktimen errealitatea ahaztuta ez geratzeko bidea hasten ari garelako. Eta bigarren, Udaleko Bozeramaleen Batzordean, biktimei guztion esker ona egiteko adostasunean, adiskidetzean eta erantzukizun historikoan oinarrituta denon arteko lanaren bigarren emaitza edo adierazpena delako ekitaldi hau. Terrorismoaren biktimei eskainitako omenaldian ere bere adierazpena eduki zuen lan horrek”.
Eskultura eta egilea
Eskulturak 3 metroko luzera, 1,60 metroko zabalera, 2 metroko garaiera eta 6.000 kiloko pisua izango ditu. Galeako pasealekuko lorategi batean kokatuko dute, Aixerrotako errotatik berrehun bat metrotara. Bere egileak azaldu du harria, burdina eta egurra lantzen dituela beti: “lan honetan harriak liburuaren forma du. Burdina eta egurra inskribatutako oharrak lirateke: burdinak euren ideiak defendatzeko borrokatu zutenen indarra irudikatzen du eta egurrak sentimenduak”, aipatu duenez (mp3). Lertxundik gaineratu du (mp3) normalean ez dituela oroimenezko eskulturak egiten, "baina nire aita frankismoaren biktima ere izan zenez, berarentzat eta beste askorentzat omenalditxoa izan zitekeela pentsatu nuen”.
Mikel Lertxundi Berriatuan jaio zen 1951an. Eskultura hizkuntza berezia du, argia eta zuzena, hitz egiten duena, baina batez ere bere materialei eta elementuei hitz egiten uzten duena, bere izaeratik eta jarreragatik. Aipatu lagunak egindako eskultura publikoak eta paisaian egindakoak Euskal Herriko hainbat tokitan ikus daitezke; baita Renon (AEB) eta Hampshire-n (Ingalaterra) ere. Egileak Espainiako hainbat erakusketa indibidualetan eta kolektibotan parte hartu du eta sari batzuk jaso ditu. Halaber, bere eskulturak zenbait erakunde eta euskal museotan daude ikusgai; baita Florentzian (Italia) eta Pforzheim-en (Alemania) ere.
Ikusi gainontzeko argazkiak:
Udalbatzan ordezkaritza duten alderdi politiko guztiek aho batez onartu dute, 1936ko gerran, aurreko gatazka zibiletan eta frankismo garaian Getxo udalerrian izandako biktimei gorazarre egitea. Horrenbestez, otsailaren 5ean, larunbata, Mikel Lertxundi artistak harriz, egurrez eta burdinez egindako “Oroimenaren liburua” izeneko eskultura inauguratuko dute Galeako pasealekuan. Udalak Eusko Jaurlaritzak emandako biktimen zerrenda dauka baina, halere, hildako getxoztar edo aipatu garaietan udalerrian hildako "guztien" —esaterako, 1936ko gerraren kasuan, "bi aldeetakoak"— senideak gonbidatu nahi ditu, Aixerrotan bertan, 11:30ean, izango den ekitaldira. Imanol Landa alkateak adierazi duenez, “jendaurreko errespetu aitortza eskaini nahi zaie biktimei, hauen oroimenez eta beraiei bihotz-bihotzetiko omenaldia eskainiz, beti ere, adiskidetzea eta elkartasuna giltza izanik". Horien guztien familiarrak komunikazio[abildua]getxo.net helbide elektronikoaren edo 944 660 100 telefono zenbakiaren bitartez harremanetan jarri ahal izango dira tokiko erakundearekin. Omenaldia urterokoa izango da. Argazkian, Lertxundi eta Landa eskulturari eusten, gaurko prentsaurrekoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun