Xehetasun gehiago eman dituzte langile erakunde abertzalearen arduradunek. Metro Bilbaoren kasuan, bi lan eskaintza omen daude, bata barne mailakoa eta bestea kanpo deialdia, eta horietan "ez da euskararen jakintza exijitzen". Zehazki Erosketa eta Kontratazio zein Marketing buruzagitzarako eskaintzak lirateke horiek. "Beraz, ezin izango da hornitzaile eta bezeroekin euskara bidezko harreman normalizaturik bermatu, aipatu sailen arduradunak ez baldin badira euskaldunak", kritikatu du LABek. Bestalde, EuskoTrenen indarrean ei da tranbia gidari, autobus gidari, mekanikari-pneumatiko eta elektriko-elektroniko lan poltsak osatzeko deialdia, eta "oinarrietan ez da, Euskara Planak zehazten duen bezala, euskararen ezagutzarik eskatzen".
Eskubide urraketa eta mespretxua
Horren guztiaren aurrean, LABek, Gasteizko Gobernuaren zein enpreson kudeatzaileen aurrean, "euskararen normalizazioan atzera urratsak" egiten ari direla nabarmendu nahi izan du, honako asmoekin: batetik, "hautaketa prozesuan iruzurra eta kontrola areagotzea, honek entxufismoa dakarrelarik". Bestalde, "zerbitzu publikoen erabiltzaileen eskubide urraketa" ematen ari dela uste dute langileen ordezkariek, baita "langileek euskaraz lan egiteko (euskara ikasteko eta lanean erabiltzeko) eta lan harremanak euskaraz garatzeko dituzten eskubideena" ere. Azkenik, "euskal hizkuntzarekiko eta bere normalizaziorako lanarekiko mespretxua sustatu" nahi dutela uste du LABek.
Euskaltzaleei deia
Sindikatu abertzaleak uste du deialdi hauek "ez direla legezkoak". Hori dela eta, bertan behera uzteko eskatu du, "Euskara Planen araberako deialdiak egin daitezen". Bestela, epaitegietara joko dutela ohartarazi dute. Era berean, LABek Gasteizko Gobernu eta enpresen kudeatzaileei dei egin die EuskoTren zein Metro Bilbaon egiten duten "hizkuntza politika alda dezaten". "Bestela antzematen den hizkuntza diskriminazio oro salatuko dugula aurreratzen dugu", aipatu dutenez. Azkenik, gizartea eta zehazki euskaltzaleak egoera hori salatzera deitu dituzte, "aipatutako bi enpresa publikoetan euskararen gaineko araudia betea izan dadin".
Metro Bilbao eta EuskoTrenen euskara "bazterreratzen" ari direla salatu du LABek
2011ko urt. 25a, 15:55
Eusko Jaurlaritzaren Garraio Sailak Metro Bilbao eta EuskoTren garraio enpresen euskara planak "bazterreratu nahian" dabilela salatu du publikoki LAB sindikatuak. "Desagertu arte, bai bere eguneroko ezarketan, bai etorkizuneko negoziazio kolektiboetan", gaineratu dutenez. Langile erakunde abertzalearen arabera, "PSE euskara lan munduan balio gabeko bihurtzeko ahaleginean dabil, gaztelera jakiteari beharrezko eta derrigorrezko irizten dion bitartean. Euskara emeki-emeki akabatu nahian dabiltza". Era berean, gaur egungo Metro Bilbao zein EuskoTreneko kudeatzaileek euskararen sustapen eta erabileraren gaineko enpresa hitzarmenak "betetzen ez" dituztela salatu du LABek, baita "aurreko administrazioarekin ere aipatu planak garatu gabe zirela" aipatu ere. Argazkian, EuskoTreneko autobusa Areetako Bizkaiko Zubiko plazako geltokian / © EuskoTren.Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun