Bostehun getxoztarri erosketa orga laga zitzaien edo poltsak etxeraino eraman zitzaizkien Gabonetan
Merkataritza eta ostalaritza establezimenduekin batera martxan jarritako “Gabonak berton. Getxon baino hobeto non” izeneko kanpainan bostehun bat herritarrek parte hartu dutela adierazi dute gaur udal arduradunek. Datu horiek eskuan, pozik agertu da Aitor Soloeta Ekonomia Sustapenerako zinegotzia, “Gabonetan udalerriko establezimenduetako bezeroei gauzak errazteko genuen helburua bete egin delako". Azaldu duenez, "gure asmoa ez zen haiek gehiago gastatzea, baizik eta gastatu behar zutena Getxon egitea. Ekimena lehenengo aldiz egin zenez, lehenengo astearen erabilerak gutxiago izan ziren. Gero, aldiz, pertsonek zerbitzua ezagutzen eta erabiltzen hasi ziren heinean azkenengo datuak altuagoak izan ziren”. Getxolanek bildutako datuen arabera, 2010eko abenduaren 10etik 2011ko urtarrilaren 7ra arte, 505 lagunek erabili zituzten maileguan utzitako erosketetarako orgak eta erositakoak etxera eramatea eskatu zuten. Bi zerbitzuak doakoak izan ziren bi zaindegietan, edo “Getxo Shop&Fun” izena zuten "meeting points" delakoetan: Areetan, Getxolandia Gabonetako parkearen ondoan; eta Algortan, Torrene kalean, hurrenez hurren. Argazkian, erosketetarako orgak mailegatzeko tokietako bat / © Getxoko Udala.
Getxoko Udalak erosketak egiteko 200 orga jarri zituen maileguan hartzeko (100 Areetan eta 100 Algortan). Guztira, 387 erabilera izan ziren (217 Areetan eta 170 Algortan), hau da, egunean bataz beste 16. Zerbitzua batez ere goizez erabili zen eta, gehienetan, jaiegun bezperatan. Abenduaren 30a izan zen erabilera gehien izan zuen eguna: 36 lagun gerturatu ziren. Erosketak etxera doan eramateari dagokionez, 118 banaketa egin ziren (75 Algortan eta 43 Areetan). Jaiegun bezperak ere izan ziren banaketa gehien egin ziren datak. Bestalde, “Gabonak berton. Getxon baino hobeto non” izeneko kanpaina aurrera eramateko Udalak bi koordinazio teknikari eta pertsonak laneratzen dituen enpresako hamabi langile izan zituen. Halaber, animazio musikala eta udalerriko abesbatzen emanaldiek Areetako eta Algortako merkataritza erdigunetan "giro ona sortzen lagundu zuten", udal arduradunen arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun